Էրդողանը բողոքել է Թուրքիայի ռազմարդյունաբերական ոլորտի նկատմամբ Արևմուտքի պատժամիջոցներից

Թուրքիան լի է վճռականությամբ՝ վերացնել ռազմարդյունաբերության ոլորտի ապրանքների ներկրման կախվածությունը։ Այս մասին հայտարարել է Թուրքիայի նախագահ Ռեջեփ Թայիփ Էրդողանը Կայսերիում ինքնաթիռների տեխնիկական սպասարկման ու վերանորոգման գործարանի բացման արարողության ժամանակ, գրում է «Անադոլու» գործակալությունը։

Էրդողանը նշել է, որ չեն մոռացել այն խնդիրները, որոնց բախվել է Անկարան օտարերկրյա գործընկերների կողմից ռազմական ոլորտի ապրանքների մատակարարումներից հրաժարվելու պատճառով։

«Գաղտնիք չէ, որ կտրուկ քննադատության են արժանանում հիմնականում ծրագրերը, որոնք Թուրքիայի ռազմական համալիրի զարգացման համար   կրիտիկական նշանակություն ունեն։ Մենք լի ենք վճռականությամբ՝ սեփական ուժերով վերացնել ազգային անվտանգության ճանապարհին առկա մարտահրավերներն ու խնդիրները։ Ռազմարդյունաբերական համալիրում ներդրումները կաճեն այնքան, մինչև ներմուծումից Թուրքիայի կախվածությունը կհասնի զրոյի»,- ասել է Էրդողանը։

Նա խոսել է տեղական ռազմարդյունաբերական համալիրի զարգացման կարևորության ու Արևմուտքի պատժամիջոցների մասին։

«Մենք հիշում ենք՝ ինչպես օտարերկրյա գործընկերները տարբեր պատճառներով հրաժարվեցին Թուրքիային զենք մատակարարել։ Չենք մոռացել, թե ինչպես Անկարայի, այսպես ասած, ընկերներն ամեն ինչ արեցին՝ Թուրքիային վնասելու համար անդրսահմանային գործողությունների ընթացքում, որն ուղղված էր մեր երկրի ազգային անվտանգության պաշտպանությանը»,- ասել է Թուրքիայի նախագահը։

Նշենք, որ ԱՄՆ-ն Թուրքիայի ռազմարդյունաբերական ոլորտի նկատմամբ պատժամիջոցներ է կիրառել, ինչպես նաև հեռացրել է F-35 կործանիչների ծրագրից։ Բացի այդ, Կանադան դադարեցրել է թուրքական «Բայրաքթար» անօդաչու սարքերի համար օգտագործվող մասերի մատակարարումը, քանի որ դրանք կիրառվել են Արցախյան պատերազմում։

Էմմա Չոբանյան