Որևէ փաստաթուղթ չի ստորագրվելու․ Պեսկովը մանրամասներ է հայտնել Պուտին-Փաշինյան առաջիկա հանդիպումից

ՌԴ նախագահի խոսնակ Դմիտրի Պեսկովը կարևորել է ՀՀ վարչապետի պաշտոնակատար Նիկոլ Փաշինյանի այցը Մոսկվա՝ նշելով, որ նրա հանդիպումը ՌԴ նախագահ Վլադիմիր Պուտինի հետ տեղի կունենա օրվա երկրորդ կեսին։ Այս մասին հաղորդում է ՌԻԱ Նովոստին։

«Օրվա երկրորդ կեսին նախատեսված է հանդիպում ՀՀ վարչապետի պաշտոնակատար Նիկոլ Փաշինյանի հետ, որը Մոսկվայում կլինի աշխատանքային այցով։ Կլինի շփում Փաշինյանի հետ, հետո Վլադիմիր Պուտինն ու Նիկոլ Փաշինյանը կշարունակեն շփումը աշխատանքային ընթրիքի ձևաչափով»,- պատմել է Պեսկովը։

«Սա կարևոր է, ըստ էության՝ առաջին արտասահմանյան այցն է, որ Փաշինյանը կատարում է խորհրդարանական ընտրություններում հաղթանակից հետո՝ բավական վստահ, համոզիչ հաղթանակ»,- հավելել է Կրեմլի խոսնակը։

Բանակցությունների արդյունքում փաստաթղթերի ստորագրում չի նախատեսվում։ Երկու երկրների ղեկավարները քննարկելու են Ղարաբաղում տիրող իրավիճակը, ռուս զինվորականների տեղակայումը, որոնք արդեն իսկ տարածաշրջանում են, ինչպես նաև երկկողմ հարաբերությունները։

«Բնականաբար, Ղարաբաղը ևս քննարկվելու է, և ռուս զինվորականների հարցը, որոնք հիմա այնտեղ տեղակայված են։ Կքննարկվեն նաև երկկողմ հարաբերությունները, սակայն որևէ փաստաթղթերի ստորագրում չի նախատեսվում»,- ասել է Պեսկովը՝ պատասխանելով հարցին՝ արդյո՞ք հանդիպման արդյունքներով ծրագրվում է համաձայնագիր ստորագրել ռուս խաղաղապահների ևս մեկ խմբի տեղակայման մասին։

Նշենք, որ ՀՀ վարչապետի պաշոնակատար Նիկոլ Փաշինյանն այսօր աշխատանքային այցով մեկնելու է ՌԴ։

Էմմա Չոբանյան