Հարյուրավոր ամերիկյան ընկերություններ կիբերհարձակման զոհ են դարձել․ այն կապում են ռուս հաքերների հետ

Շուրջ 200 ամերիկյան ընկերություններ են տուժել Ամերիկյան Kaseya IT ընկերության վրա կիբեռհարձակումից, որը զբաղվում է ծրագրային ապահովմամբ և հեռակա կառավարմամբ: Կիբերանվտանգության ոլորտի մասնագետները կարծում են, որ հարձակման հետևում կարող են կանգնած լինել ցանացահեններ Ռուսաստանից։ Այս մասին հաղորդում է BBC-ի ռուսական ծառայությունը։

Kaseya-ի վրա կիբերհարձակման մասին առաջիններից մեկը հայտնել է Huntress Labs ընկերությունը, որը մասնագիտացած է կիբերանվտանգության ոլորտում: Կատարվածի պատասխանատվությունն ընկերությունը դրել է REvil հաքերային խմբավորման վրա, որի գործունեությունը կապում են Ռուսաստանի հետ։

Kaseya-ն իր կայքում հաստատել է, որ հետաքննում է իր սերվերների վրա հնարավոր կիբերհարձակումը: Ընկերության տվյալներով ՝ հաքերները կարող էին «կոտրել» հավելվածը, որը կառավարում է կորպորատիվ սերվերները, համակարգիչները և ցանցային սարքերը: Kaseya-ն իր հայտարարության մեջ կոչ է արել բոլոր հաճախորդներին, ովքեր օգտվում են այս հավելվածից, անմիջապես անջատել սերվերները:

Ընկերությունը հայտարարում է, որ հարձակումից տուժել է ընդհանուր առմամբ 10 000 մարդ 10 երկրից: Huntress Labs-ն իր հերթին ներկայացրել է կիբերհարձակումից տուժած Kaseya-ի ամերիկյան հաճախորդների թիվը․ մոտ 200 ընկերություն։  Այդ թիվը շարունակում է աճել:

Huntress Labs-ի տվյալներով ՝ Kaseya ընկերությունը դարձել է շորթող վիրուսի զոհը, որը դրանից հետո տարածվել է կորպորատիվ ցանցերով, որոնք օգտագործում են դրա ծրագրային ապահովումը: Ցանցահենները կիբերհարձակումների զոհերից պահանջում են 45 հազար դոլար փոխանցել կրիպտոարժույթով, նշում է Huntress Labs-ը: Այս տեղեկությունը հաստատում են նաև կիբերանվտանգության այլ մասնագետներ, որոնց այժմ դիմում են տուժած ընկերությունները:

ԱՄՆ-ի կիբերանվտանգության և ենթակառուցվածքների գործակալությունը նույնպես հաստատել է հարձակման փաստը և հայտնել, որ զբաղվում է դրա հետաքննությամբ: