Գերիների հարցով պետք էր սփյուռքի ներուժն օգտագործել, աշխարհի դեսպանատների մոտ պետք է պիկետներ լինեին. ՏԵՍԱՆՅՈՒԹ

Գերիների վերադարձի հարցը միայն իրենց բարեկամների խնդիրը չէ, դա միայն ՀՀ-ում ԵԽԽՎ պատվիրակության խնդիրը չէ, խորհրդարանի մեծամասնության խնդիրը չէ, դա ամբողջ հայության խնդիրն է: Այս մասին հայտարարեց ԱԺ «Իմ քայլը» խմբակցության պատգամավոր Հովհաննես Իգիթյանը՝ ԵԽԽՎ ԱԺ պատվիրակության մամուլի ասուլիսի  ժամանակ։

«Ես գտնում է, որ այդ հարցում մի սխալ ենք թույլ տվել՝ չենք օգտագործել կարևոր հանգամանք՝ դա ամբողջ հայության ներուժի կիրառումն է: Ես գտնում եմ, որ այսօր աշխարհի ցանկացած երկրում Ադրբեջանի դեսպանության մոտ պետք է պիկետ լինի: Պետք է այնպես անել, որ աշխարհը տեսնի և Ադրբեջանի դիվանագիտական ներկայությունը դիսկոմֆորտ զգա։

Եթե երկրի օրենքը թույլ է տալիս, որ միայն մեկ հոգի կանգնած լինի, թող մեկը կանգնած լինի, եթե կովիդի պատճառով թույլատրվում է երեք հոգի կանգնեն՝ դիստանցիայով, թող այդպես կանգնած լինեն: Դա պետք է դառնա մեր համար մեկ խնդիրը, հարցն այդ դեպքում առաջ կշարժվի և կդառնա միջազգային հանրության խնդիր»,- նշեց պատգամավորը՝ հավելելով, որ այս հարցը չպետք է լինի որևէ քաղաքական ուժի մենաշնորհ, չպետք է դառնա շահարկման առարկա, այլ պետք է լինի մեր օրակարգը:

«Չեմ կարծում, որ ընդդիմությունից կամ իշխանությունից որևէ մեկը այդ հարցում ունի այլ կարծիք։ Ցավոք, ընտրությունների ժամանակ քաղաքկան վիճակը տարածվեց Սփյուռքի որոշ կազմակերպությունների վրա, զբաղվում էին ոչ իրենց բնորոշ հարցերով՝ քաղաքական հարցերով։ Համոզված եմ, որ հիմա ամեն ինչ կգա իր տեղը»,- նշեց Իգիթյանը:

Մանրամասները՝ տեսանյութում: