Ինչ նպատակով է Փաշինյանը փորձում համախմբել արտախորհրդարանական ուժերին․ ՏԵՍԱՆՅՈՒԹ

Նիկոլ Փաշինյանն ընտրություններին մասնակցած և խորհրդարան չանցած քաղաքական ուժերին անգործ չի թողնի: Վարչապետի պաշտոնակատարը, ընտրությունների նախնական արդյունքները պարզ դառնալուց հետո, Կառավարություն է հրավիրել անցողիկ շեմը չհաղթահարած քաղաքական ուժերին և առաջարկել ստեղծել արտախորհրդարանական ուժերից ձևավորված խորհուրդ կամ մարմին:

Կառավարությունն ու Փաշինյանի հետ հանդիպած ուժերը դեռ չեն մանրամասնում, թե ստեղծվելիք մարմինն ինչ գործառույթներ է իրականացնելու: Մինչ երկու կողմերը, լռում են փորձագիտական շրջանակները Փաշինյանի առաջարկի վերաբերյալ վերլուծություններ են կատարում:

Քաղտեխնոլոգ Արմեն Բադալյանը հիշում է՝ նախկին իշխանության ժամանակ ընտրություններից հետո Սերժ Սարգսյանի հետ հանդիպած ընդդիմադիր գործիչներին տրվեց «հաճախորդ» բնորոշումը: Ըստ փորձագետի՝ նույն իրավիճակն է հիմա, միայն Սերժ Սարգսյանի փոխարեն այժմ Նիկոլ Փաշինյանն է իշխանության ղեկին:

Հասարակական պահանջ կա, որ իշխանությունն ու ընդդիմությունը պետք է համագործակցեն, կարծում է «Ազատ քաղաքացի» ՀԿ նախագահ Հովսեփ Խուրշուդյանը և շեշտում, որ ընդդիմությունը պետք է համագործակցի իշխանության հետ՝ իր ձայնը լսելի դարձնելու համար: Նա չի կիսում այն տեսակետը, որ ընդդիմադիրներն այս ձևաչափով համագործակցելու դեպքում դառնում են իշխանության «հաճախորդները»:

Արմեն Բադալյանն էլ չի կարծում, թե Նիկոլ Փաշինյանը լսելու է արտախորհրդանական ուժերից կազմված խորհրդի առաջարկներն ու հաշվի է առնելու դրանք որոշումներ կայացնելիս: Ըստ քաղտեխնոլոգի՝ սա ձևական բնույթ ունեցող կառույց է լինելու:

Հովսեփ Խուրշուդյանը, սակայն, Փաշինյանի կառավարության և քաղհասարակության ու ընդդիմության համագործակցության հաջողված դեպքեր է հիշում: Ըստ Խուրշուդյանի՝ դրանք թեև քիչ են, բայց՝ արդյունավետ:

Քաղաքական կառավարման մասնագետ Մասիս Պողոյանը կարևորում է նման մարմնի ստեղծումը: ԱԺ անցած ընդդիմությունը, ըստ կառավարման ոլորտի մասնագետի, միտված է թուլացնելու իշխանությանը:

Մասիս Պողոյանն ասում է՝ այս հարթակում գործունեություն ծավալող ընդդիմությունը կարող է նաև համախմբել իշխանություններից դժգոհող քաղաքացիներին, որոնց համար այլընտրանքը, փորձագետի բնորոշմամբ, հակահեղափոխական ուժերն են լինելու:

Փաշինյանի հետ հանդիպած քաղաքական ուժերի ներկայացուցիչների դիրքորոշումն այս մարմնում ընդգրկվելու հետ կապված թեև հայտնի չէ, բայց հարց է առաջանում՝ նրանց համագործակցությունն ինչպե՞ս է ստացվելու, եթե գործ ունենք միմյանց հետ գաղափարական հակասություններ ունեցող գործիչների հետ:

Մանրամասները՝ տեսանյութում։

Նարեկ Կիրակոսյան