ՔՊ-ն սահմանադրական մեծամասնություն կունենա՞․ նոր խորհրդարանի նախնական պատկերն ու մանդատների թիվը․ ՏԵՍԱՆՅՈՒԹ

Երեկ՝ հունիսի 23-ին, 19 տարածքային ընտրական հանձնաժողովներում իրականացվեց 65 տեղամասերի քվեարկության արդյունքների վերահաշվարկ։ Դրանցից 27-ում թեկնածուներին տրված կողմ ձայների որևէ փոփոխություն չարձանագրվեց: Այս մասին տեղեկանում ենք ԿԸՀ-ից։

Վերահաշվարկված մյուս տեղամասերի արդյունքներով արձանագրվեցին կողմ ձայների որոշակի փոփոխություններ։ Մասնավորապես, «Քաղաքացիական պայմանագիր» կուսակցության դեպքում ձայների քանակն ավելացավ 659-ով, «Հայաստան» դաշինքի դեպքում՝ 744-ով, ԱԺԲ-ի դեպքում ձայները պակասեցին 60-ով, «Ինքնիշխան Հայաստան» կուսակցության և «Շիրինյան-Բաբաջանյան ժողովրդավարների դաշինքի» դեպքում ձայներն ավելացան 52-ով։ Մնացյալ ուժերի դեպքում փոփոխությունները չնչին էին՝ մինչև 5 ձայնի շրջանակում։

Նախնական հաշվարկով՝ նոր խորհրդարանում «Քաղաքացիական պայմանագիր» կուսակցությունը կունենա 71 պատգամավոր, «Հայաստան» դաշինքը՝ 27, իսկ «Պատիվ ունեմ» դաշինքը՝ 7։ Այս համամասնությամբ ստացվում է, որ իշխող ՔՊ-ն նոր խորհրդարանում ստանում է մանդատների 2/3-րդից ավելին, քանի որ 2/3-ը մոտ 66 տոկոսն է, իսկ 71 պատգամավորը 67% է կազմում։

«Հիմա ամբողջ խնդիրը 2/3-րդի մեջ է և 3/5-րդի, որտեղ փոքրամասնությունը կարող է հասնել հաջողության, իսկ մեծամասնությունը կաշկանդված կլինի։ Այդ իմաստով փոքրամասնությունը բավական լավ շանսեր ունի՝ արդյունավետ հակակշռելու»,- Factor TV-ի հետ զրույցում ասաց փաստաբան Արա Ղազարյանը։

Իշխանական պատգամավոր Վահագն Հովակիմյանը հակառակ տեսակետն ունի։ Ըստ նրա՝ իրենց ուժի համար նոր խորհրդարանում աշխատանքը բարդ չի լինի, քանի որ ՔՊ-ն, միևնույն է, բացարձակ մեծամասնություն է կազմելու։

Այն, որ իշխող ուժը նախորդ ընտրությունների արդյունքում ստացած 88 մանդատի փոխարեն հունիսի 20-ին կայացած արտահերթ խորհրդարանական ընտրությունների արդյունքում կունենա 71 մանդատ, շատ բան չի փոխի ընդդիմադիր խմբակցությունների կյանքում, կարծում է «Ընդդեմ իրավական կամայականության» ՀԿ գործադիր տնօրեն Լարիսա Ալավերդյանը։

Մանրամասները՝ տեսանյութում։

Մերի Մարտիրոսյան