«Հայաստան» դաշինքը ցանկացած որոշում ընդունելիս միասնական է․ Իշխան Սաղաթելյան

Մամուլում տեղեկություն էր տարածվել այն մասին, թե «Հայաստան» դաշինքի՝ երեկ կայացած նիստում որոշում է կայացվել, որ ՀՅԴ-ն և «Վերածնվող Հայաստան» կուսակցությունները կվերցնեն պատգամավորական մանդատները, իսկ Ռոբերտ Քոչարյանի համակիրները կհրաժարվեն դրանցից։

Վերոնշյալի վերաբերյալ մեկնաբանություն ստանալու նպատակով Factor.am-ը զրուցեց ՀՅԴ ԳՄ անդամ, «Հայաստան» դաշինքի անդամ Իշխան Սաղաթելյանի հետ։ Վերջինս մեզ ասաց, որ կեղծ լուրեր են:

«Սուտ են ասում, տենց բան չկա, հիմար լուրեր են, մեկնաբանության ոչ արժանի»,- ասաց նա։

«Հայաստան» դաշինքի ներկայացուցիչների մասնակցությամբ երեկ կայացած ասուլիսի ընթացքում դաշինքի առաջնորդ Ռոբերտ Քոչարյանը հայտարարել էր, թե «մանդատները վերցնել կամ չվերցնելու վերաբերյալ «Հայաստան» դաշինքում դեռ վերջնական որոշում չունեն։

Անդրադառնալով այս հարցին՝ Սաղաթելյանը մեզ հետ զրույցում նշեց, որ դեռ որոշում չեն կայացրել․ «Երբ այդ մասին որոշում կայացնենք՝ կասենք, դուք կիմանաք։ Դաշինքը ցանկացած որոշում ընդունելիս միասնական է»։

Հիշեցնենք, որ, ըստ նախնական հաշվարկների, արտահերթ խորհրդարանական ընտրություններին «Հայաստան» դաշինքը ստացել է 22,1% ձայն: Երեկվանից ընթանում է 70 տեղամասերի քվեաթերթիկների վերահաշվարկ։ Նշենք նաև, որ դաշինքը չի ընդունում ընտրությունների արդյունքները և պատրաստվում է դիմել Սահմանադրական դատարան։

Թեմայի առնչությամբ մեկնաբանություն փորձեցինք ստանալ նաև «Հայաստան» դաշինքի նախընտրական կենտրոնական շտաբի պաշտոնական ներկայացուցիչ Արամ Վարդանյանից, սակայն մեր զանգերն անպատասխան մնացին։

Արփի Հակոբյան