Քարոզարշավին ամենաշատ գումարը ծախսում են ՔՊԿ-ն, «Հայաստան» և «Պատիվ ունեմ» դաշինքները

Խորհրդարանական արտահերթ ընտրությունների նախընտրական քարոզարշավի համար կուսակցությունները և դաշինքները միլիոնավոր դրամներ են ծախսում:

Factor.am-ը ներկայացնում է, թե մինչև հունիսի 11-ի դրությամբ քաղաքական ուժերը որքան գումար են մուտքագրել նախընտրական հիմնադրամներ և որքանն են ծախսել այդ օրվա դրությամբ:

Քարոզարշավի ընթացքում ֆինանսական ամենամեծ միջոցներ ծախսած ուժերն են «Քաղաքացիական պայմանագիր» կուսակցությունը , «Պատիվ ունեմ» ու «Հայաստան» դաշինքները:

Նիկոլ Փաշինյանի ղեկավարած ՔՊ-ն նախընտրական հիմնադրամ մուտքագրել է 257 մլն դրամ, որից արդեն ծախսել է 168 մլն դրամը: Ռոբերտ Քոչարյանի «Հայաստան» դաշինքը 220 մլն դրամից 166 մլն դրամն է ծախսել, իսկ Արթուր Վանեցյանի գլխավորած «Պատիվ ունեմ» դաշինքը 215 մլն դրամից 133 մլն-ն է ծախսել:

Ի տարբերություն այս երեք ուժերի՝ քարոզարշավին բավականին քիչ գումար է ծախսում Գագիկ Ծառուկյանի «Բարգավաճ Հայաստան» կուսակցությունը: ԲՀԿ-ն 55,6 մլն դրամից ծախսել է 55 մլն դրամը: Էդմոն Մարուքյանի «Լուսավոր Հայաստան» կուսակցությունը 47,8 մլն-ից ծախսել է 25,8 մլն դրամը, ՀԱԿ-ը՝ 40,8 մլն դրամից 34,4 մլն դրամը:

«Մեր տունը Հայաստանն է» կուսակցությունը, որի վարչապետի թեկնածուն Տիգրան Ուրիխանյանն է, քարոզարշավի նշված օրերի ընթացքում ծախսել է 48,9 մլն դրամ, իսկ հիմնադրամ մուտքագրել է 49,8 մլն դրամ:

«Բաբաջանյան-Շիրինյան» ժողովրդավարների դաշինքն էլ ամբողջությամբ ծախսել է շուրջ 19 մլն դրամ մուտքագրված գումարը:

«Քաղաքացու որոշում», «Վերելք», «Ազատական», «Հայաստանի եվրոպական» կուսակցություններն էլ հունիսի 11-ի դրությամբ նախընտրական հիմնադրամ մուտքագրած գումար չունեն: «Ազատություն» և ԱԺԲ կուսակցություններն էլ հիմնադրամ մուտքագրած գումարներից հունիսի 11-ի դրությամբ ծախս չեն կատարել:

Դավիթ Սանասարյանի «Ինքնիշխան Հայաստան» կուսակցությունը մուտքագրել է 100 հազար դրամ, ծախսել՝ 60 հազար դրամ:

Ընդհանուր առմամբ, 24 ուժերը նախընտրական հիմնադրամներ մուտքագրել են 961,5 մլն դրամ, որից ծախսվել է 697,6 մլն դրամը:

Նշենք, որ այս տվյալները հունիսի 11-ի դրությամբ են, հետևաբար՝ մինչև քարոզարշավի ավարտն այս թվերը կենթարկվեն փոփոխության, որոնք կներկայացնենք հետագայում:

Նարեկ Կիրակոսյան