26.04.2026 | 21:21
Իրավիճակը Մալիում․ մահացել է պաշտպանության նախարարը, երկրում թեժ մարտեր են
Թուրքիայի ընդդիմությունը Էրդողանից պահանջում է արտահերթ ընտրություններ անցկացնել
Քաղաքականություն
15.06.2021 | 22:42
Թուրքիայի գլխավոր ընդդիմադիր Ժողովրդա-հանրապետական կուսակցությունը հերթական անգամ նախագահ Ռեջեփ Թայիփ Էրդողանին արտահերթ ընտրություններ անցկացնելու կոչ է արել, գրում է «Duvar» պարբերականը։
«Եթե վերջին 19 տարում պետությունը ղեկավարողներն ասեն ընդդիմությանը՝ Դուք սոված եք, եթե նրանք իրենց վրա պատասխանատվություն չեն վերցնում՝ լուծում գտնելու մարդկանց խնդիրներին, ապա ջենթլմենը (նկատի ունի Էրդողանին) պիտի իր տեղը զիջի մեզ, ովքեր կկատարեն այդ պարտականությունը»,- ասել է ընդդիմադիր կուսակցության մամուլի խոսնակ Ֆաիք Օզթրաքը մամուլի ասուլիսի ընթացքում։
«Ակնհայտ է՝ ինչ պետք է անել։ Բերեք քվեատուփերը ազգի առաջ, որքան հնարավոր է՝ շուտ։ Մենք պատրաստ ենք գործը ստանձնել»,- հավելել է նա։
Թուրքիայի հաջորդ ընտրությունները տեղի են ունենալու երկու տարի անց, սակայն ընդդիմադիր կուսակցությունները ճնշում են իշխող «Արդարություն ու զարգացում» կուսակցությանը՝ ավելի վաղ կազմակերպել դրանք։
Ժողովրդա-հանրապետական կուսակցությունը պարբերաբար է կրկնում, որ «երկիրը ստեղծված վիճակից փրկելու միակ ճանապարհը» արտահերթ ընտրություններն են։ IYI-ը՝ «Լավ կուսակցությունը» ևս նշում է, որ կառավարությունը բավարար պլաններ չունի առկա տնտեսական ճգնաժամը կառավարելու համար, և փորձում է ճնշում գործադրել արտահերթ ընտրություններ անցկացնել համամր։
Ավելի վաղ իշխող կուսակցությունը մերժել էր արտահերթ ընտրությունների անցկացումը՝ նշելով, որ նման օրակարգ չկա։
Ի դեպ, Թուրքիայում անցկացված վերջին հարցումները ցույց են տալիս, որ իշխող կուսակցության հանրային աջակցությունը ռեկորդային ցածր մակարդակի է հասել, քանի որ հասարակությունը կորցրել է վստահությունը կառավարության՝ վատթարացող տնտեսական քաղաքականության նկատմամբ։
Էմմա Չոբանյան
