«Գործ տվողների դեմ պայքար տանողներն ամենախոշոր գործ տվողներն են»․ Նիկոլ Փաշինյան

«Կոռուպցիայի կանխարգելման հանձնաժողովի» նախագծի քննարկումները «ստիպեցին» «Ելք» խմբակցության ղեկավար Նիկոլ Փաշինյանին երկու անգամ ելույթով հանդես գալ․ այս անգամ պատգամավորը խոսք խնդրեց խմբակցության անունից:

«Ուզում եմ ելույթ ունենալ որպես «ԿՈՇ» ՔԿՀ-ի նախկին կալանավոր և տարակուսանքս հայտնել այն կապակցությամբ, որ և՛ նախորդ գումարման, և՛ ընթացիկ գումարման ԱԺ-ում հնչում են մտքեր, հնչում են արտահայտություններ, որոնք ստիպում են ինձ զգալ «ԿՈՇ»-ի պատերից ներս։ Անընդհատ ասվում է «գործ տալ» հասկացությունը, եկեք մի բան ֆիքսենք, որ «գործ տալ», «գործ տվող» դրանք հանցագործ աշխարհին բնորոշ հասկացություններ են, իսկ հանցագործ աշխարհի գործառնական հասկացությունը թալանելն է»,- ասաց նա։

Փաշինյանը խոսեց այն ուղերձների մասին, որոնք խորհրդարանը հղում է հանրությանը: «Բանակում ունեցած բազմաթիվ պրոբլեմները հենց այս խնդրի հետ են կապված, երբ մեկը տեսնում է, որ մեկը տանկից վառելիք է գողանում և պետք է զեկուցագիր գրի ղեկավարությանը, որ մարտական հերթապահության մեջ գտնվող տանկի մեջ վառելիք չկա, կողքից՝ արա, դու հո գործ տվող չե՞ս։ Մարդկանց կյանքերն է դրված զոհասեղանին, սա արդեն էթիկայի հարց է, թե ինչ հասկացություններով ենք մենք առաջանորդվում»,- նկատեց ընդդիմադիր պատգամավորը։

Նիկոլ Փաշինյանի խոսքով՝ պետք է խորհրդարանը թույլ չտա, որ երկրի թիվ մեկ քաղաքական ամբիոնից հնչեն այնպիսի ելույթներ, որոնք «պատերի տակ պպզածներին թույլ կտան իերնց զգալ ՀՀ-ի տեր»։ «Որպես «ԿՈՇ»-ի նախկին կալանավոր կարող եմ ասել, որ «գործ տալու» մասին ազդարարողներն իրենք սահմանված ժամանակ վազում և ակտիվ «գործ են տալիս»՝ ստեր գրելով, հենց էդ գողականները, որոնք միֆ են ստեղծել»,- ասաց նա՝ նկատելով, որ «գործ տվողների դեմ պայքար տանողներն ամենախոշոր գործ տվողներն են»։

Սեդա Ղուկասյան