Վերջին ամիսներին Ռուսաստանից Հայաստան մարդասիրական օգնություն ուղարկելը դադարեցվել է

Այս տարվա առաջին 4 ամիսներին ԱՊՀ երկրներից, այդ թվում՝  Ռուսաստանից Հայաստան մարդասիրական օգնություն չի ուղարկվել։ Այս մասին տեղեկանում ենք պետական վիճակագրական ծառայության հրապարակած տվյալներից։

Ուսումնասիրելով վերջին տարիների տվյալները՝ պարզ է դառնում, որ 2019 թվականից սկսած էապես կրճատվել է Ռուսաստանից Հայաստան ուղարկվող մարդասիրական օգնությունը, իսկ նախորդ տարվա սեպտեմբերից առհասարակ դադարել է։

Այսպես․ 2018 թվականին Ռուսաստանից Հայաստան է ուղարկվել 1 մլն 606 հազար դոլարի մարդասիրական օգնություն, իսկ 2019 թվականին՝ շուրջ 174 հազար դոլարի։

Այսինքն՝ 2019 թվականին 2018-ի համեմատ Ռուսաստանից ուղարկվող մարդասիրական օգնությունը կրճատվել է 89,2 %-ով։

Իսկ 2020 թվականին Ռուսաստանից Հայաստան է ուղարկվել շուրջ 100 հազար դոլարի մարդասիրական օգնություն։ Այպիսով՝ 2020 թվականին՝ նախորդ՝ 2019 թվականի համեմատ Ռուսաստանից ստացված մարդասիրական օգնությունը կրկին նվազել է, այս անգամ՝ 42,3 %-ով։

Ուսումնասիրելով 2020 թվականին  վիճակագրական կոմիտեի հրապարակած ամսական տվյալները, արձանագրենք հետևյալը․ 2020 թվականի հունվար-օգոստոս ամիսներին Ռուսաստանից ուղարկված մարդասիրական օգնությունը կազմել է շուրջ 100 հազար դոլար, այնուհետև, հաջորդ ամիսներին կատարված հրապարակումներում այս թիվը չի փոխվել։

Այսպիսով՝ կարող ենք փաստել, որ նախորդ տարվա սեպտեմբեր ամսից Ռուսաստանից դադարել են Հայաստան մարդասիրական օգնություն ուղարկել։

Նշենք, որ այս տարվա հունվար-ապրիլ ամիսներին նախորդ տարվա նույն ժամանակահատվածի համեմատ 20.5 անգամ ավելացել է Իսպանիայից, 28.5 անգամ՝ Նիդերլանդներից, 5,3 անգամ Ֆիանսիայից, 3,5 անգամ՝ ԱՄՆ-ից, 2,2 անգամ՝ Չինաստանից ուղարկված մարդասիրական օգնությունը։ 

Factor.am-ը Վիճակագրական կոմիտեից տեղեկացավ, որ Հայաստան ուղարկված մարդասիրական օգնությունը ստացվում է իրավաբանական անձանց կողմից, որոնց մեջ են մտնում առևտրային (Հասարակական կազմակերպություններ, հիմնադրամներ և այլն) և ոչ առևտրային կազմակերպությունները (Սահմանափակ պատասխանատվությամբ ընկերություններ, լիարժեք պատասխանատվությամբ ընկերություններ, բաժնետիրական ընկերություններ և այլն)։ 

Անժելա Պողոսյան