Գյումրիում Փաշինյանի և Քոչարյանի կողմնակիցների միջև հրմշտոցի փաստով ոստիկանությունում նյութեր են նախապատրաստվում. ՏԵՍԱՆՅՈՒԹ

Երեկ Գյումրու Սայաթ-Նովա 1 հասցեում գտնվող «Վերածնվող Հայաստան» կուսակցության մարզային գրասենյակի դիմաց Նիկոլ Փաշինյանի և Ռոբերտ Քոչարյանի կողմնակիցների միջև տեղի ունեցած միջադեպի առթիվ ՀՀ ոստիկանության Գյումրիի «Կումայրի» բաժնում նյութեր են նախապատրաստվում։

ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանը Factor.am-ին տեղեկացրեց, որ նյութերի նախապատրաստման համար հիմք է հանդիսացել «Վերածնվող Հայաստան» կուսակցության Շիրակի մարզային գրասենյակի ղեկավար Կարապետ Պողոսյանի այն գրառումը, որ ՔՊ-ի երթի ժամանակ Գյումրու Սայաթ-Նովա փողոցում կրծքավանդակի հատվածում հարված է ստացել։

Կարապետ Պողոսյանը մեզ հետ զրույցում տեղեկացրեց, որ իրեն հրավիրել են ոստիկանություն, սակայն չի ուզում դեպքի մասին մանրամասներ ասել։ Ըստ նրա, հունիսի 9-ին ժամը 20:20 սահմաններում, երբ Նիկոլ Փաշինյանի գլխավորությամբ ՔՊ-ականները քայլերթ էին անցկացնում Գյումրիում՝ անցնելով իրենց գրասենյակի դիմացով, հայտնվել են սադրիչներ, որոնք սկսել են «Նիկոլ, դավաճան» բղավել։

Կարապետ Պողոսյանի խոսքով՝ ՔՊ-ի պատգամավորի թեկնածու Խաչատուր Սուքիասյանն էլ այդ պահին հրահանգել է կարմիր բերետավորներին քաշքշել իրենց։ Միջադեպը, ըստ «Վերածնվող Հայաստան» կուսակցության մարզային գրասենյակի պատասխանատուի, հարթել են տեղի ոստիկանները՝ կանգնելով կարմիր բերետավորների ու Ռոբերտ Քոչարյանի համակիրների միջև ու թույլ չտալով բախումներ։

Մենք պարզաբանում խնդրեցինք նաև Խաչատուր Սուքիասյանի մամուլի խոսնակ Աննա Մկրտչյանից։ Նա աբսուրդ համարեց այս պատմությունը։ «Եթե ցնդաբանություն են ասում, ոնց կարող եմ մեկնաբանել»,- ասաց Աննա Մկրտչյանը։

Արմիկ Մովսիսյան