Կարող է՝ պարոն Այվազյանի հայտարարությունները չեն սրանք, սա կարելի է անվանել Օնիկ Գասպարյան-2 գործընթաց․ ԱԽ քարտուղարի հետ հարցազրույցն ամբողջությամբ՝ ժամը 18:30-ին

-Փաշինյանի առաջարկը՝ կա՛մ ԵԱՀԿ Մինսկի խմբի համանախագահ երկրների, կա՛մ ՌԴ-ի կողմից դիտորդների ներգրավելու վերաբերյալ, ի վերջո, Հայաստանի շահերի՞ց էր բխում, քանի որ հենց այդ առաջարկին հաջորդեց ԱԳՆ պաշտոնակատարի հրաժարականը։ Արա Այվազյանը մասնավորապես ասել էր, թե որևէ կասկած պետք է չլինի, որ ԱԳ նախարարությունը կարող է ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել։ Քանի որ սա հաջորդեց Փաշինյանի առաջարկին, մեկնաբանվեց, որ հենց այդ առաաջարկն էր մեր շահերին դեմ։ Կասե՞ք՝ կոնկրետ որ կետն էր մեր շահերին դեմ։

-Գիտեք, որ դրանից հետո վարչապետի խոսնակը խնդրել էր պարզաբանումներ տալ, որովհետև ոչ մեկի համար հասկանալի չէր, թե պարոն Այվազյանը նման հայտարարություններ անելով՝ ինչ նկատի ունի։ Ընդհանրապես, մեզ մոտ ընդունված է, որ քողարկված հայտարարություն են անում՝ առանց որևէ բացատրության, միակ հասցեատերը, որը կարող է պարզաբանում տալ, ինքն է։ Ես միայն կարող եմ ասել, որ մայիսի 12-ից սկսած Անվտանգության խորհրդի 7-8 նիստ ենք ունեցել կամ Անվտանգության խորհդրի անդամներով քննարկումներ ենք ունեցել, այդ 7-8 օրերին քննարկվել են հնարավոր բոլոր տարբերակները, ներկա է եղել նաև Արա Այվազյանը։

-Առարկություններ չի՞ ունեցել այդ հանդիպումների ժամանակ։

-Ես չեմ հիշում, որ Անվտանգտության խորհրդի նիստում մեր առաջարկություններին որևէ մեկը առարկություն ունենար։ Տեսեք՝ երբ քննարկվել է, որ ԵԱՀԿ Մինսկի խումբը պետք է ակտիվանա, ես չեմ հիշում, որ որևէ մեկն ասի՝ չէ, ԵԱՀԿ Մինսկի խումբը պետք է ակտիվ չլինի։ Չի կարող 7-8 նիստ լինել, օրումեջ քննարկել այդ հարցերը, և ընդհանուր կոնսենսուս չլինի։ Ես չգիտեմ, թե ինչ միտք է ունեցել նա և շարունակում է լռել։ Բայց Անվտանգության խորհրդի նիստերի արձանագրությունները կան, որտեղ հստակ է, որ այս ճանապարհով ենք գնում, և որևէ առարկություն չի եղել։

-Ճի՞շտ հասկացա՝ Դուք պնդում եք, որ Փաշինյանի այդ առաջարկի մեջ պետական շահի դեմ որևէ բան չկա, և որ Արա Այվազյանի խոսքերը Ձեզ համար անհասկանալի են։

-Միանշանակ՝ չի եղել։ Ավելին ասեմ՝ այս հարցերը քննարկվել են, այս մտքերը քննարկվել են, և Անվտանգության խորհրդի նիստում ձևավորվել է կոնսենսուս։ Եվ հետաքրքրիր է, որ այդ նիստերից հետո նման հայտարարություն է հնչում, և կարելի է կարծել, որ կարող է՝ պարոն Այվազյանի հայտարարությունները չեն սրանք, որովհետև մենք փորձ ունենք՝ Օնիկ Գասպարյանի փորձը։ Սա կարելի է անվանել Օնիկ Գասպարյան-2 գործընթաց։

-Այսինքն՝ ո՞ւմ եք տեսնում պարոն Այվազյանի մեջքի հետևում։

-Իրեն չեմ տեսնում՝ հաստատ։

Մանրամասները՝ տեսանյութում։

Լիլիթ Շաբոյան