Մեզ պարտադրեցին ընտրություններ․ պատրաստ ենք վերջին զարկը տալու՝ հանուն Հայաստանի ապագայի․ Սերժ Սարգսյան․ ՏԵՍԱՆՅՈՒԹ

ս տեսնում եմ, որ շատերդ զարմացած եք, որ արարողակարգով առաջինը պետք է լիներ իմ ելույթը, բայց խոսեց պարոն Վանեցյանը: Այս մասին «Պատիվ ունեմ» դաշինքի նախընտրական քարոզչության պաշտոնական մեկնարկի արարողության ժամանակ նշեց ՀՀ երրորդ նախագահ, ՀՀԿ ղեկավար Սերժ Սարգսյանը:

«Կարծում եմ՝ դա ճիշտ է, ես եմ առաջարկել և իմ այդ քայլով ևս մեկ անգամ ընդգծել եմ, որ գեներալ Վանեցյանը գլխավորում է մեր դաշինքի ցուցակը: Ուրեմն ամեն տեղը ինքը պետք է լինի առաջինը, պետք է առջևից գնա, պետք է առաջնորդի մեր թիմը, իսկ ես իմ փորձով, իմ հնարավորություններով և խորհուրդներով անհրաժեշտ պահին կանգնած եմ նրա թիկունքից, ձեզնից յուրաքանչյուրի թիկունքին»,- նշեց Սարգսյանը:

Նա ընդգծեց, որ քարոզարշավը մեկնարկում է ոչ սովորական պայմաններում. «Ինչպես գիտեք այս ընտրությունները մեր երազանքը չէին, մեզ պարտադրեցին արտահերթ ընտրություններ հայրենիքի համար այս ծանր օրերին և մենք ընդունեցինք մարտահրավերը և պատրաստ ենք այս կռիվը, կամ ինչպես մեր էպոսում է ասվում, վերջին զարկը տալու հանուն Հայաստանի ապագայի: Սեփական աթոռը հայրենիքից առավել սիրող այս կապիտուլյանտների իշխանությունը ցավոք, չհեռացավ և ընտրեց հոգեբանական ծանր վիճակում գտնող ժողովրդին նոր ցնցումների տանելու ճանապարհը, որին մենք ի սկզբանե դեմ էինք: ՀՀԿ-ի և «Հայրենիք» կուսակցության ձևավորած դաշինքը իր օրինակով է ժողովորիդն ցույց տալիս հանուն նպատակների փոխզիջումների գնալու  և միասին աշխատելու անհրաժեշտությունը:

Սարգսյանի խոսքով՝ գալիք 2 շաբաթում իրենց դաշինքի թեկնածուները իրենց հետ միասին կշրջեն բոլոր մարզերով և կներկայանան ժողովրդի դատին. «Մենք վճռական ենք տրամադրված, մեր թիմի յուրաքանչյուր անդամ ցուցակում կամ ցուցակից դուրս, կարող է անվարան հայտարարել, որ ունի գիտելիք, փորձ, բավարար կամք և պատիվ այս կապիտուլյանտների իշխանությունից երկիրը մաքրելու համար:

Բոլորս պետք է հստակ գիտակցենք, որ սա սովորական ընտրություն չէ: Այս անգամ  ընտրությունը պետություն ունենալ-չունենալու միջև է: Այս ընտրությունը հայրենիքը կորցնելու և չկորցնելու միջև է, անկախ պետություն չունեցող ժողովուրդներին միանալու կամ դրանից խուսափելու ևս մեկ կամ նույսնիկ վերջին շանս ստանալու համար է:

Մանրամասները՝ տեսանյութում: