«Որևէ մարդ չի արտագաղթել խոշորացված համայնքներից». ՏԿԶՆ պաշտոնյայի ֆանտաստիկ թեզը

Հայաստանի խորհրդարանը քննարկում է համայնքների խոշորացման ծրագիրը, որով այս փուլում նախատեսվում է շուրջ 10 անգամ կրճատել Հայաստանի մի շարք համայնքներ: Մարզային բնակչության շրջանում մտավախություն կա, որ իրենց գյուղը, քաղաքը կորցնելու է իր նշանակությունը, ինքնուրույնությունն ու ժամանակի հետ նաև անունը, քանի որ 6-7-8 փոքր համայքներ միավորվում են մեկ համայնքում:

Տարածքային կառավարման և զարգացման նախարարության տեղական ինքնակառավարման վարչության պետ Աշոտ Գիլոյանը factor.am-ի հետ զրույցում հայտարարում է, որ նման մտահոգություններն անհիմն են և որևէ գյուղ կամ քաղաք չի կորցնելու իր անունը կան ինքնուրույնությունը միավորման արդյունքում: Ըտս նրա՝ փոքր համայնքներում տեղական ինքնակառավարման կառույցները 20 տարի իրենց ծառայությունները պատշաճ չեն մատուցել բնակչությանը ու խոշորացման արդյունքում դրանք վերափոխվում են:

ՏԿԶՆ պաշտոնյան նաև պնդում է, որ վարչատարածքային նոր բաժանումը կապ չունի արտագաղթի հետ: Հարցին, թե նշանակում է, որ 20 և ավելի տարիների ընթացքում ՀՀ իշխանությունն այդպես էլ չկարողացավ զարգացնել մարզային ենթակառուցվածքները ու հիմա օպտիմալացնում է համայքները, քանի որ հսկայական արտագաղթ կա, ասաց. «Գնացեք և խոշորացված համայնքներում տեսեք՝ որևէ մարդ արտագաղթե՞լ է, թե՞ չէ: Որևէ մարդ չի արտագաղթել խոշորացված համայնքներից 6 ամսվա ընթացքում, որովհետև մարդիկ տեսնում են, արդեն կա տեղաշարժ դեպի լավը»:

Մանրամասները դիտեք ՏԿԶՆ տեղական ինքնակառավարման վարչության պետ Աշոտ Գիլոյանի հետ factor.am-ի հարցազրույցում:

Մարինե Խառատյան