Թող գան բանավեճի, ուղիղ եթերում ցույց տան իրենց տղամարդկությունն ու հայերենի իմացությունը. Կոնջորյան. ՏԵՍԱՆՅՈՒԹ

Քաղաքական բանավեճերի ընթացքում սրությունը ընդունված երևույթ է բոլոր ժողովրդավարական երկրներում: Այս մասին ԱԺ ճեպազրույցների ժամին ասաց «Իմ քայլը» խմբակցության պատգամավոր Հայկ Կոնջորյանը՝ անդրադառնալով բանավեճի մշակույթին:

«Մենք ոչ ոքի չենք հետապնդում փողոցներում, մարդկանց չենք ծեծում, բարևելու համար մարդկանց նկատմամբ բռնություն չենք գործադրում: Դրանք մեր արժեբանության մեջ չեն, մենք մարդկանց հետ բանավիճում ենք հռետորաբանության մակարդակում: Նրանց, ովքեր հնչեցնում են սպառնալիքներ, խոսքը առաջնորդների մասին է, հրավեր կա, որ գան և ուղիղ եթերով իրենց խելացիությունը, խիզախությունը, տղամարդկությունը, հայերենին տիրապետելու հմտությունները, նաև այլ հմտություններ ի ցույց դնեն ժողովրդին: Բանավեճը ընդունելը, մերժելը նաև վերաբերմունք են ժողովրդի նկատմամբ: Ժողովուրդը, որը պետք է ընտրի, պետք է տեսնի, թե առաջնորդը ինչպես է ուղիղ եթերով իրեն դրսևորում: Եթե վախենալու բան չունեն, որ իրենց իմիջմեյքերների կառուցած միֆերը կարող են ընդամենը մի քանի րոպեների ընթացքում փլուզվել, ապա պետք է բոլորը ընդունեն բանավեճի հրավերը և ոչ թե փակ դահլիճներում ծածուկ հանդիպումներ կազմակերպեն»,- ասաց Կոնջորյանը:

Նա նաև ընդգծեց, որ բանավեճը մերժելը առաջին հերթին նշանակելու է, որ դու չես հարգում ժողովրդին, որն իրավունք ունի տեսնելու բանավեճը և իր գնահատականը տալու. «Մերժելը բացահայտելու է բոլոր սարսափներն ու վախերը»:

Մանրամասները՝ տեսանյութում: