Մեր տարածքում գտնվող հակառակորդի թիվը չի գերազանցում 1000-ը. ԳՇ պետի տեղակալ. ՏԵՍԱՆՅՈՒԹ

Մեր տարածքում գտնվող հակառակորդի թիվը չի գերազանցում 1000-ը: Այս մասին այսօր լրագրողների հետ հանդիպմանը հայտարարեց ՀՀ ԶՈՒ օպերատիվ գլխավոր վարչության պետ-ԶՈՒ ԳՇ պետի տեղակալ, գեներալ-մայոր Էդվարդ Ասրյանը:

Նրա խոսքով՝ ստորաբաժանումների վերածելով ու հարաբերակցելով այդ ուղղությամբ գտնվող մեր ստորաբաժանումների հետ՝ հակառակորդի 1000 զինծառայողը մեր տարածքում լուրջ խնդիրներ կատարելու հնարավորություններ չունի:

«Եթե հարցին լուծում տանք ռազմական ուժի կիրառմամբ, ապա այդ 1000 զինծառայողը մեր տարածքից դուրս գալ չի կարող: Կոչնչացնենք բոլորին անխտիր»,- նշեց Ասրյանը:

«Քաղաքական ղեկավարությունը չկրակելու հրաման չի տալիս, ռազմական ղեկավարությունն է տալիս այդպիսի հրաման»,- վստահեցրեց Ասրյանը՝ պատասխանելով դիտարկմանը, թե քաղաքական ղեկավարությունը ԶՈւ-ին չկրակելու հրաման է տվել:

Ասրյանի խոսքով՝ եթե հայկական կողմը զգա, որ հակառակորդի հետ արդեն չի կարող ձեռնամարտի բռնվել, և համապատասխան նախանշաններ լինեն, որ հակառակորդն արդեն ձգտում է այլ ուղղությամբ իր պայմանները թելադրել, ռազմական ուժ կկիրառի:

«Կոչնչացնենք մեր տարածքում գտնվող հակառակորդի բոլոր զինծառայողներին: Բոլորը նշանառման տակ են, նրանց զինծառայողները, նրանց տեղադրած վրանները, միջոցները տեսանելի են: Թաքնված ուժեր չկան», – ասաց նա:

ԳՇ պաշտոնյայի գնահատմամբ, ներկայում համապատասխան նախանշաներ դեռևս չկան: Նա ընդգծեց, որ ԶՈւ-ին ոչ ոք չի արգելում պարտականությունները կատարել:

Մանրամասները՝ տեսանյութում: