Միջազգային արձագանքը շատ խոսուն է․ Իրանը նույնպես մտահոգված է․ Արա Այվազյան. ՏԵՍԱՆՅՈՒԹ

Եվրախորհրդարանի բանաձևը՝ գերիների վերադարձի վերաբերյալ, բացարձակ մեծամասնության կողմ քվեարկությանն արժանացավ: Այդ մասին ԱԺ-ում Կառավարության անդամների հետ հարցուպատասխանի ժամանակ ասաց ԱԳ նախարարի պաշտոնակատար Արա Այվազյանը:

«Բանաձևում առանցքային հարցեր կան, որոնք համահունչ են ՀՀ դիրքորոշմանը: Վերջին օրերին իրավիճակի սրումը կարող է տպավորություն ստեղծել, որ գերիների վերադարձի հարցը ստվերում է մնացել: Կարող եմ վստահեցնել, որ մեր բոլոր միջազգային գործընկերների հետ շփումներում այդ հարցը բարձրաձայնվում է:

Ադրբեջանի միջազգային ճնշումն օրեցօր աճում է, կարծես միջազգային կոնսենսուս կա այս հարցի վերաբերյալ, ինչպես նաև Կառավարությունը որոշել է ստեղծված իրավիճակը քաղաքական և դիվանագիտական միջոցներով հասցեագրել:

Կարծում եմ՝ պահը կգա, որ Ադրբեջանը չի կարողանա հերքել այս միջազգային ճնշումը՝ սկսած մարդասիրական բնույթի հարցերից մինչև ՀՀ ինքնիշխան տարածքներ ներթափանցելու իր փորձը և դուրս գալուց հրաժարվելը: Շարունակելու ենք շատ հետևողականորեն և նպատակաուղղված այս հարցը առաջ տանել: Հակառակ պարագայում՝ Ադրբեջանը կարող է առճակատվել շատ ավելի լուրջ հետևանքների»,- նշեց արտգործնախարարի պաշտոնակատարը:

Այվազյանը հավելեց, որ միջազգային արձագանքը շատ խոսուն է. «Նաև մեր տարածաշրջանային գործընկերները հայտնել են իրենց դիրոքորոշումը: Իրանը նույնպես մտահոգված է Ադրբեջանի սադրիչ գործողությունների հետևանքով»:

Մանրամասները՝ տեսանյութում: