Բոլորի հետ խոսել, լեզու գտնել, մինչև մեծ փոթորիկներն անցնեն․ Արման Եղոյանը միասնականության կոչ արեց. ՏԵՍԱՆՅՈՒԹ

Վերջին շրջանում համաշխարհային ուժային կենտրոնների հարաբերությունները փոխվում են տարերային արագությամբ: Այս մասին ԱԺ-ում հայտարարությունների ժամին նշեց «Իմ քայլը» խմբակցության պատգամավոր Արման Եղոյանը:

«Լավագույնը, որ փոքր ազգերը կարող են անել նման իրավիճակներում, իրենց գոյութենական անվտանգությունն ապահովելն է, բոլորի հետ խոսել, լեզու գտնել, մինչև մեծ փոթորիկներն անցնեն: Մեր երկրում գերտերությունների շահերը հակադրել փորձողը առնվազն հիմար է, առավելագույնը՝ նույնիսկ ազդեցության գործակալ:

Ով փորձում է հիմա հայհոյել Ռուսաստանին, ԱՄՆ-ին, Ֆրանսիային, Չինաստանին, Հնդկաստանին, Իրանին, իմացեք՝ նա Հայաստանի թշնամին է: Մենք մեր գործողություններով երբևէ չպետք է տեղ տանք որևէ գերտերության այստեղ՝ իրենցից մեկի դեմ որևէ դավադրության նշույլ անգամ նշմարել:

Մեծերի բախման կիզակետում փոքրերը շահելու բան չունեն… Պետք է ամեն ինչ անենք, որպեսզի մեր երկրում մեծերի շահերը ոչ թե հակադրվեն, այլ համադրվեն: Հզոր տերությունները այլ չափումներով են մտածում, այլ մասշտաբներով են գծեր քաշում, ու իրենց քաշած գծերի հաստությունը մեր նման պետությունների՝ նույնիսկ ամենալայն հատվածից ավելի լայն կարող է լինել: Մեծերի հետ հարաբերություններում մենք պետք է դնենք միայն մեր, հայկական շահը. միայն այդ դեպքում է, որ այդ շահը շանս կունենա քննության առարկա դառնալու և շահերի մեծ ընտանիքում ներառվելու»,- նշեց պատգամավորը և միասնականության կոչ արեց:

Մանրամասները՝ տեսանյութում: