11.12.2024 | 21:44
Ադրբեջանի ընդդիմությունը ԱՄՆ-ին ու ԵՄ-ին կոչ է անում երկրի իշխանությունների դեմ պատժամիջոցներ սահմանել
«Մարտի 1»-ը ձեր ամոթն է, իմ ամոթը չի. թեժ բանավեճ Նիկոլ Փաշինյանի և Գևորգ Կոստանյանի միջև
Քաղաքականություն
21.02.2018 | 14:39
Ազգային ժողովի պետաիրավական և մարդու իրավունքների պաշտպանության հարցերի մշտական հանձնաժողովի նիստում այսօր քննարկվեց «2008 թվականի Մարտի 1-ի իրադարձությունների վերաբերյալ» «Ելք» խմբակցության հայտարարության նախագիծը: Ընդդիմադիր «Ելք» խմբակցությունը, ի թիվս այլ պահանջների, կոչ է անում գլխավոր դատախազությանը «Մարտի 1, 2»-ի գործով կալանավորված, դատապարտված ընդդիմադիր քաղաքական գործիչների, ակտիվիստների մեղադրական դատավճիռները վերանայելու գործընթաց սկսել։
Հայաստանի նախկին գլխավոր դատախազ, այժմ ԱԺ ՀՀԿ խմբակցության պատգամավոր Գևորգ Կոստանյանը, սակայն, այս առնչությամբ ներկայացրեց առարկություններ՝ նկատելով՝ այդ գործընթացը հստակ կարգավորվում է օրենքով, Քրեական դատավարության օրենսգրքով:
«Նման դատական ակտերը վերաբացելու հստակ չափանիշներ և հիմքեր կան, հիմա արդյոք դուք գտնում եք, որ առկա են իրավական հիմքեր, որպեսզի այդ գործերը վերաբացվեն, եթե այո, ապա ինչո՞ւ չեք գնում իրավական ճանապարհով, այլ դուք՝ որպես ընդդիմադիր գործիչ, առաջարկում եք հայտարարությամբ հանդես գալ»,- Փաշինյանին հարց ուղղեց՝ նախկին գլխավոր դատախազը:
Փաշինյանն արձագանքեց՝ դա ժեստ է Հայաստանի Հանրապետությանը, որ այդ բոլոր քողարկված գործերը գնալու են Մարդու իրավունքների եվրոպական դատարան: «Եվ այդ ժամանակ ամբողջ Հայաստանի Հանրապետությունով գոռալու ենք՝ վա՜յ, Նանի ջան, էս ինչ եղավ, բա հիմա էդ փողերն ո՞վ ա տալու, խի՞ ա տալու»,- նշեց Փաշինյանն, ապա այդ կոնտեքստում որոշեց անեկդոտ պատմել, ինչը դուր չեկավ հանձնաժողովի ՀՀԿ-ական անդամներին:
Հանրապետական խմբակցության պատգամավոր Գևորգ Կոստանյանը լքեց նիստերի դահլիճը, ապա րոպեներ անց վերադարձավ՝ պարզաբանելով. ««Մարտի 1»-ը լրջագույն հարց է երկրի պատմության համար և ամոթալի էջերից է, ամոթ է բոլորիս: Անեկդոտ պատմելն անընդունելի է, էլ չեմ խոսում զուտ մասնագիտական տեսակետից՝ մենք լուրջ հարց ենք քննարկում, դուք անեկդոտներով եք համեմում»,- դժգոհեց նախկին գլխավոր դատախազը:
Նիկոլ Փաշինյանը վրդովվեց. ««Մարտի 1»-ը ձեր ամոթն է, ոչ թե իմ։ Անեկդոտն էլ պատմում էի ոչ թե «Մարտի 1»-ի կամ նրա զոհերի մասին, այլ Հայաստանի այն իրավիճակի մասին, որում հայտնվում ենք ՄԻԵԴ վճիռների պատճառով»:
Մանրամասները՝ տեսանյութում:
Շողիկ Գալստյան
