Քաղաքականություն
24.05.2021 | 12:46Վերջնական որոշում ունենք. մենք անպայման մասնակցելու ենք ընտրություններին, այսօր այդ մասին հայտարարություն կտարածվի: Այս մասին այսօր լրագրողների հետ զրույցում ասաց Արցախի անվտանգության խորհրդի նախկին քարտուղար, ՊԲ նախկին հրամանատար Սամվել Բաբայանը:
«Եթե չենք ուզում այս սև ու սպիտակով գնանք ու երկիրն ընդհանրապես կործանենք, դրա համար մենք մտնում ենք գործընթացի մեջ, որ այսպես ասած, մեջտեղի գիծը լինենք և թույլ չտանք, որ արյունահեղություն լինի, բայց ամեն ինչ գնում է դրան: Կապ չունի ով է հաղթում, ով է պարտվում, դա բերելու է արյունահեղության: Մենք ամեն ինչ անելու ենք, որ բանը դրան չհասնի»,-հայտարարեց Սամվել Բաբայանը:
Անդրադառնալով հարցին, թե կա՞ որևէ ուժ, որի հետ կբացառի համագործակցությունը, Բաբայանը պատասխանեց, որ չի բացառում որևէ ուժի հետ համագործակցությունը. «Ինչ վերաբերում է երեք նախագահների՝ ընտրական գործընթացներին մասնակցությանը, հասարակությունն է որոշելու՝ իրենց կառավարելու հնարավորություն տալու է, թե ոչ: Մենք անգամ չգիտենք՝ ինչ ուժեր են մտնելու խորհրդարան: Ամեն ինչ ժողովուրդն է որոշելու: Ես զարմանում եմ, որ ասում են՝ մենք հաղթելու ենք, էս ենք անելու: Ոչ մեկն էլ չի հաղթելու, հաղթելու է ժողովուրդը, ում էլ իր ձայնը տա»:
Հնարավոր խախտումների, ընտրակաշառքների վերաբերյալ հարցին ի պատասխան՝ Սամվել Բաբայանը պատասխանեց, որ գումարներ բաժանվում են և բաժանվելու են, դա միանշանակ է. «Ամեն կուսակցություն իր վստահված անձն ունի ընտրատեղամասում, և նա պարտավոր է պահելու ձայները: Եթե մարդ չունես, ապա հարց է ծագում՝ ինչու ես մտել պայքարի մեջ: Ընտրակաշառքի դեմը ոչ ոք չի կարող առնել, բացի պետական մարմնից: Ներքին գործերն են, անվտանգությունն է, որ պետք է զբաղվեն դրանով: Հիմա կանեն, թե չէ… ես այսօր տեղեկատվություն ունեմ, որբ տեղ-տեղ դրանով զբաղվում են, դեռ ոչ մասսայական»:
Մանրամասները՝ տեսանյութում:
