«Բանակ չունենք, դրա համար էլ վախեցել են կրակել». Սամվել Բաբայանը՝ թշնամու ՀՀ մտնելու մասին. ՏԵՍԱՆՅՈՒԹ

Պետք է առաջին հերթին բանակ ունենայինք. բանակ չունենք, դրա համար էլ այսօր վախենում ենք կրակել։ Այս մասին լրագրողների հետ զրույցում ասաց Արցախի անվտանգության խորհրդի նախկին քարտուղար, ՊԲ նախկին հրամանատար Սամվել Բաբայանը՝ անդրադառնալով վերջին օրերին Սյունիքում և Գեղարքունիքում ստեղծված իրավիճակին։

«Բանակ չունենալու համար մեղավոր են բոլոր նրանք, որոնք ղեկավարել են երկիրը վերջին 20 տարիներին: «Բայց կա մեղավորություն և կա հանցագործություն: Ես առաջարկում եմ ստուգել, հանցագործությունները ճշտել և այդ մարդկանց պատժել»,- նշեց Բաբայանը:

Անդրադառնալով Դիտարկմանը, որ բանակի հասցեին իր քննադատությունը շատերը ծանր էին ընդունել, հակադարձում էին, որ բանակը միակ կայացած կառույցն է,  Սամվել Բաբայանը նշեց. «Որևէ մեկը չի ցանկանում իր վրա մեղքը վերցնել, որ ինքն է մեղավոր, դրա համար էլ միշտ հայտարարելու են, որ բանակը միակ կայացած կառույցն էր: Ես դրան ուշադրություն չեմ դարձնում։ Ես օրինակ եմ բերել, որ 1992թվականին ո՞վ էր մեղավոր, որ Շահումյան, Մարտակերտ, էդ ուղղությամբ հանձնեցինք, մինչև էսօր չգիտենք, հիմա էլ է նույնը: Այն ժամանակ էլ մեկը մյուսին պաս էր տալիս՝ ով է մեղավոր։ Հիմա որ չասենք ՝ սա է մեղավոր կամ, նա, պետք է քննել ու  հասկանալ, թե ով պետք է որոշում կայացներ, հրաման արձակեր, դիմեր վերադասին. ով որ չի կատարել իր պարտականությունը, նա էլ մեղավորն է»:

Բաբայանի դիտարկմամբ՝ մեր ռազմաքաղաքական ղեկավարության խնդիրն էր թույլ չտալ, որ հակառակորդը ներթափանցեր մեր տարածք. «Բայց եթե արդեն թույլ է տվել, մենք մեր բանակի քանակն էլ գիտենք և մեր սահմանի ողջ երկարությունը գիտենք: Հիմա սահմանը 2-3 անգամ երկարել է, չհաշված Թուրքիայի ճակատը: Դա բերելու էր սրան, որ մարդ էլ չունես կանգնեցնելու: Դրա համար ես ասում եմ, որ պետք է բանակ կառուցես, գլուխդ կախես, ատամներդ սեղմես ու կառուցես պրոֆեսիոնալ բանակ: Էն հեքիաթը, որ պատմում են, թե փող չունենք, էս չունենք, էն չունենք… Փող չունեք, գերի հանձնվեք թուրքին, պարսիկին, ռուսին, ամերիկացուն, մեկին գերի հանձնվեք… Հա՛րց տվեք կառավարությանը, հարցրեք՝ պատերազմի հետո ինչքան փող եք ծախսել, մեկ միլիարդ ծախսե՞լ եք: Բա ինչի՞ չէիք մեկ միլիարդի զենք առնում: Քանի միլիարդ էլ ծախսելու եք: Ասեք՝ խելք չունենք, հասկանանք, բայց որ ասում եք՝ փող չունենք, չենք հասկանում»։

Մանրամասները՝ տեսանյութում: