Այո, դա միակ փաստաթուղթն է․ չկա որևէ գաղտնի հավելված․ Փաշինյանը՝ տարածված փաստաթղթի մասին․ ՏԵՍԱՆՅՈՒԹ

«Ասք այն մասին, թե ինչպես իրեն ընդդիմություն հորջորջող որոշակի շրջանակներ ամեն ինչ անում են, որ ադրբեջանական զորքը հանկարծ չլքի ՀՀ տարածքը»,- վերջին օրերին տեղի ունեցող գործընթացը այսպես է վերնագրել վարչապետի պաշտոնակատար Նիկոլ Փաշինյանը: Այս մասին Ազգային ժողովում իր ելույթում նշեց Փաշինյանը:

«Իմ գնահատականը շարունակում է մնալ այն, որ Ադրբեջանի գործողությունների նպատակը սահմանային ռազմական բախում հրահրելն է»,- ասաց վարչապետի պաշտոնակատարը:

Նիկոլ Փաշինյանը կառավարության աշխատանքը գնահատեց թիմային, համակարգված և արդյունավետ, քանի որ միջազգային հանրությունում իրավիճակի վերաբերյալ, ըստ նրա, կա համաձայնություն, որով արձանագրվում է  Ադրբեջանի գործողությունների ապօրինությունը և ՀՀ տարածքը լքելու անհրաժեշտությունը:

«Մեր դիրքորոշումը շարունակում է մնալ այն, որ առանց նախապայմանների Ադրբեջանի զորքերը պետք է լքեն ՀՀ սահմանը: Կա փաստ, որ չունենք դելիմիտացված և դեմարկացված սահման»,- նշեց Փաշինյանը՝ հավելելով, որ եռակողմ հանձնաժողով ձևավորելու առաջարկ կա:

«Ես կոռեկտ չեմ համարել, որ աշխատանքային փաստաթուղթը, որը դեռ քննարկումների փուլում է, հրապարակվի, դա վատ ու անլուրջ վիճակի մեջ կդնի որևէ կառավարության, բայց քանի որ հրապարակված է ընդդիմության կողմից, ապա ասեմ, որ, այո՛, դա միակ և եզակի փաստաթուղթն է, որը օր ու կես, երկու օր գտնվում է մեր աշխատանքային շրջանառության մեջ, դրա մեջ ամենակարևորն այն դրույթն է, որ կողմերը պարտավորվում են, որ սահմանային իրադրությունները լուծվում են ոչ թե զորքերի փոխադարձ շարժերով, այլ դիվանագիտական քաղաքական ճանապարհներով… Հանձնաժողովների ձևավորումը տեղի կունենա, երբ ադրբեջանական ուժերը կլքեն ՀՀ տարածքը, կամ կարձանագրենք մի դրույթ, որտեղ նշված կլինի կոնկրետ ժամկետում զորքերի հետքաշման գործընթացի մասին:

Սա է, ըստ էության, ամբողջ պատմությունը: Չկա և չի կարող լինել գաղտնի հավելված: Սա ինքնին աշխատանքային գաղտնի փաստաթուղթ է: Պետք է հասկանանք, որ մենք՝ բոլորս, շատ լարված ենք և շատ ծանր ճանապարհի միջով ենք անցել և անցնում, բայց դա չի նշանակում, որ պետք է պարզ բաներ չնկատենք»,- նշեց Փաշինյանը:

Մանրամասները՝ տեսանյութում: