15.10.2026 | 00:05
NATO-ի նավատորմին ծառայություններ մատուցող ընկերությունը կասկածվում է 1 միլիոն եվրոյի խարդախության մեջ
Եվրախորհրդարանում Ղարաբաղյան շարժման 30-ամյակին նվիրված խորհրդաժողով կկազմակերպվի
Քաղաքականություն
20.02.2018 | 18:44
Ղարաբաղյան շարժման 30-ամյա տարեդարձի կապակցությամբ, «Լեռնային Ղարաբաղը և Եվրոպական Միությունը. 1988-2018. Լեռնային Ղարաբաղի հակամարտության շուրջ ԵՄ քաղաքականության երեսուն տարիների ամփոփումը» թեմայով փետրվարի 28-ին Եվրախորհրդարանում խորհրդաժողով կկազմակերպվի. տեղեկացնում է «Արցախպրեսը»:
Նախաձեռնության հեղինակներն են «Հայաստանի եվրոպացի բարեկամներ» («EuFoA») միջազգային հասարակական կազմակերպությունը և Եվրոպայի «Հայկական բարեգործական ընդհանուր միություն»-ը («AGBU Europe»): Խորհրդաժողովի ընթացքում եվրոպացի խորհրդարանականների և փորձագետների կողմից կներկայացվեն վկայություններ, թե Եվրոպայի խորհրդարանը ինչպիսի վերաբերմունք է դրսևորել 1988 թ. փետրվարից 1991թ. մայիսն ընկած ժամանակահատվածում Արցախում ստեղծված ճգնաժամի նկատմամբ:
Կքննարկվի ԵՄ ներկայիս քաղաքականությունը արցախյան հիմնախնդրի վերաբերյալ, ինչպես նաև կլինեն հակամարտության գոտում ապրող ժողովուրդների միջև փոխվստահության ստեղծմանն ու խաղաղության խրախուսմանն ուղղված մի շարք խորհրդատվություններ:
Ըստ ծրագրի՝ ողջույնի խոսքով հանդես կգա ԵԽ պատգամավոր, ԵԽ-Արցախ բարեկամական խմբի ղեկավար Ֆրանկ Էնգելը: Խորհրդաժողովին առանձին ելույթներով հանդես կգան լրագրող Ցվետանա Պասկալևան, ԵԽ պատգամավորներ Յարոմիր Շտետինան, Էլենի Տեոխարուսը, Լարս Ադակտուսոնը, Նիդեռլանդների «Քլինգենդաել» միջազգային հարաբերությունների ինստիտուտից Պաուլ Միրթսը և ուրիշներ:
