Որտե՞ղ են «Լիա» գեղեցկության սրահում աղմկահարույց սպանության գործով իրեղեն ապացույցները

2016թ. նոյեմբերի 13-ին Շենգավիթում «Լիա» գեղեցկության սրահում տեղի ունեցած աղմկահարույց սպանության գործով այսօր դատարանում հետազոտվեց իրեղեն ապացույցների մի մասը:

Հետազոտված ապացույցների մեջ էին սպանված Մուշեղ Մուշեղյանի հագուստները՝ տաբատը, վերնազգեստը, գոտին, ներքնաշորերը: Հետազոտված ապացույցների մեջ կար նաև բարձ և անկողնու ծածկոց. տեղեկացնում է «Փաստինֆոն»:

Իսկ որտե՞ղ են սպանության գործով իրեղեն ապացույց ճանաչված լազերային կրիչները, պարկուճները, «Վերտու» հեռախոսները: Այս իրեղենները դատական նիստերի դահլիճ չէին բերվել և նախագահող դատավոր Նելլի Բաղդասարյանը հայտարարեց, որ դատական նիստը ընդմիջվում է որպեսզի դրանք հայտնաբերեն, ապա հետազոտվեն:

Ընդմիջված նիստը որոշ ժամանակ անց վերսկսվեց, սակայն այս ընթացքում նախագահողը իրեղենները չկարողացավ հայտնաբերել և դիմելով գործով դատախազ Գևորգ Գևորգյանին՝ խնդրեց պարզել, թե ուղարկե՞լ են արդյոք այդ իրեղենները դատարան, թե՝ ոչ:

Նիստի ավարտից հետո դատախազը, պատասխանելով լրագրողների հարցին, թե որտեղ են պահվում այդ իրեղենները, պատասխանեց՝ դատարանում՝ իրեղեն ապացույցների համար նախատեսված սենյակում: Իսկ այն հարցին, թե իրենց կողմից ուղարկվե՞լ է դատարան, դրական պատասխան տվեց:

Առնվազն տարօրինակ է, որ գործով նախագահող դատավորը նախորդ դատական նիստում հայտարարում է, որ պետք է այսօր հետազոտվեն իրեղեն ապացույցները և նախապես քայլեր չի ձեռնարկում՝ պարզելու համար արդյոք այդ ապացույցներն ամբողջությամբ դատարանու՞մ են, թե՝ ոչ:

Իսկ եթե նախաքննական մարմնի կողմից ուղարկվել են, ապա ինչո՞ւ դատարանը պատշաճ կարգով քրեական գործի վերաբերյալ իրեղեն ապացույցները չի պահում մեկ տեղում:

Այսօրվա դատական նիստը հետաձգվեց և հաջորդ դատական նիստը նշանակվեց մարտի 13-ին:

Նշենք նաև, որ «Լիա» գեղեցկության սրահում արձակված կրակոցների հետևանքով երկու անձ՝ Երևան քաղաքի բնակիչներ Գևորգ Ավետիսյանը և Մուշեղ Մուշեղյանը, ստացել են կյանքի հետ անհամատեղելի մարմնական վնասվածքներ և մահացել են: Բացի այդ, Մուշեղ Մուշեղյանի դիակի զննությամբ հայտնաբերվել էր նաև կտրող-ծակող առարկայով պատճառված մարմնական վնասվածք՝ որովայնի շրջանում։