Եթե անհատներս ենք սահմանի կահավորման համար ամենն անում, չհամարձակվե՛ք խրոխտ դեմքով ասել՝ դուք եք արել. Սոյֆա Հովսեփյան․ ՏԵՍԱՆՅՈՒԹ

«Զգոնության պակաս կար, չգիտես ինչի էին սպասում՝ ճիշտ չգնահատելով թշնամուն և ակնկալելով, որ օրենքը կպահեն, արժեքներ կունենան և չեն մտնի իրենց չպատկանող տարածք: Ադրբեջանցիները զավթողներ են և զավթողական քաղաքականությամբ են միշտ զբաղվել»,- այս մասին Factor.am-ի հետ զրույցում նշեց ԱԺ պատգամավոր Սոֆյա Հովսեփյանը՝ անդրադառնալով Սյունիքում ստեղծված իրավիճակին՝ կապված ադրբեջանցիների կողմից ՀՀ սահմանը հատելու և 3,5 կմ առաջ գալու հետ:

«Ընթացող բանակցությունները բավականին բարդ կլինեն: Մենք արագ կազմակերպման շատ լուրջ խնդիրներ ունենք, փոխանակ մինչ խնդիրների առաջանալը պաշտպանություն կազմակերպենք, խնդիրներ առաջանալուց հետո ենք փորձում հետևանքները վերացնել, որն այնքան էլ չի ստացվում»,- նշեց պատգամավորը:

Անդրադառնալով Ախ քարտուղարի հայտարարությանը, որ այս ընթացքում հնարավոր չի եղել առաջնագծի այդ հատվածը կահավորել՝ պայմնավորված եղանակային պայմաններով, Հովսեփյանը նշեց. «Իսկ առաջնագծի ո՞ր հատվածն են կահավորել իրենք: Ես ԱԺ իմ ելույթում էլ ասացի՝ մեր արածը, որպես ձեր կողմից իրականացված աշխատանքի հաշվետվություն չներկայացնեք: Եթե անհատներս ենք սահմանի կահավորման համար ամենն անում, չհամարձակվե՛ք խրոխտ դեմքով ասել, թե դուք եք արել: Դուք ոչ մի բան չեք արել:

Այո՛, կան կահավորված շատ սահմաններ, բայց այդ աշխատանքներն իրենց հետ կապ չունեն: Եվ սահմանի Սյունիքի հատվածում ամբողջական կահավորման կարիք դեռ չկա, քանի որ դեմարկացիայի հարց կա, ընդամենը որոշակի կենցաղային հարցերի լուծման անհրաժեշտություն կա, որպեսզի պատերազմի, կատաղի մարտերի միջով անցած մեր զինվորները կարողանան սահմանի բարձր գոտում կանգնել, սակայն, ցավոք, այդ պայմանները չեն ստեղծվել»,-ասաց պատգամավորը:

Մանրամասները՝ տեսանյութում: