16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
«Չենք պատրաստվում ոչ մի մետր թողնել իրենց». ՊՆ
Քաղաքականություն
14.05.2021 | 12:29
Այս պահին ադրբեջանցիները դեռևս Սյունիքում են, իրենց զբաղեցված հատվածում և սպասում են իրենց վերադասի հրահանգին։ Երեկ ուշ երեկոյան Խնձորեսկի տարածքում հայկական և ադրբեջանական կողմերի միջև բանակցություններ են եղել, որի ժամանակ հայկական կողմը ներկայացրել է իր դիրքորոշումը։
Այս մասին Factor TV-ի հետ զրույցում տեղեկացրին ՊՆ-ից։ «Հայկական կողմը ներկայացրել է իր դիրքորոշումը, որ այդ տարածքները մերն են, և դա չի քննարկվում, մենք չենք պատրաստվում ոչ մի մետր թողնել իրենց, և իրենք պետք է վերադառնան իրենց ելման դիրքեր»,- նշեցին ՊՆ-ից։
Հարցին՝ արդյոք ինչ-որ պատասխան արդեն ստացվե՞լ է, ՊՆ ներկայացուցիչը պատասխանեց․ «Չեմ կարող ասել, մեր պահանջը ներկայացվել է, ենթարդում եմ, որ իրենք պետք է գնան, զեկուցեն»: Անդրադառնալով բանակցություններին ռուսական կողմի մասնակցությանը՝ ՊՆ ներկայացուցիչը նշեց, որ տեղեկություն չունի և ոչինչ չի կարող ասել:
Հիշեցնենք, որ մայիսի 12-ին Ադրբեջանի զինուժը հատել է պետական սահմանը և խորացել մինչև 3.5 կմ։ Իսկ մայիսի 13-ին, ըստ ՊՆ հաղորդագրության, ադրբեջանական զինված ուժերը, կրկին՝ «սահմանների ճշգրտման» հիմնավորմամբ, հերթական սադրանքն է իրականացրել Հայաստանի Հանրապետության ինքնիշխան տարածքի նկատմամբ՝ փորձելով դիրքային առաջխաղացում ապահովել Վարդենիսի և Սիսիանի սահմանային հատվածներում։
Անժելա Պողոսյան
