21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Լավրովն Ալիևի հետ հանդիպմանը խոսել է ԼՂ-ում սահմանների, ՅՈՒՆԵՍԿՕ-ի, ԼՂ-ի վերականգնմանը ռուսական բիզնեսի ներգրավման մասին
Քաղաքականություն
11.05.2021 | 13:33
Աշխատանքային այցով Բաքվում գտնվող ՌԴ ԱԳ նախարար Սերգեյ Լավրովը երեկ երեկոյան հանդիպել է Ադրբեջանի նախագահ Իլհամ Ալիևի հետ։ Լավրովը, մասնավորապես, ասել է, որ Լեռնային Ղարաբաղի տարածաշրջանում սահմանների հետ կապված հարցերը չնայած բարդ են, բայց՝ լուծելի, գրում է ՏԱՍՍ-ը։
«Մենք շնորհակալ ենք մեր խաղաղապահների դերի բարձր գնահատման համար։ Կանենք ամեն ինչ, որ բոլորը ելնեն այն հանգամանքից, որ ռազմական ասպեկտները փակ են։ Հիմա անհրաժեշտ է զբաղվել կոնկրետ գործերով։ Կա դելիմիտացիա, դեմարկացիա։ Ամեն ինչ հեշտ չէ, բայց լուծելի է՝ մեր համոզմամբ։ Ռազմական փորձագետները, դիվանագետների մասնակացությամբ, կարող են պայմանավորվել փոխընդունելի լուծումների շուրջ»,- ասել է Սերգեյ Լավրովը։
Ռուսաստանցի դիվանագետը նաև անդրադարձել է Լեռնային Ղարաբաղում ՅՈՒՆԵՍԿՕ-ի աշխատանքին։ Նրա խոսքով՝ Մոսկվան պատրաստ է պայմաններ ստեղծել ՅՈՒՆԵՍԿՕ-ի համար՝ ԼՂ-ի մշակութային ժառանգության պահպանման գործում։
«ՅՈՒՆԵՍԿՕ-ն, որպես կազմակերպություն, որը պատասխանատու է միջազգային մշակութային ժառանգության պահպանման համար, նույնպես հետաքրքրված է մասնակցել այդ ջանքերին։ Մենք պատրաստ ենք նպաստել պայմանների ստեղծմանը, որոնք դա հնարավոր կդարձնեն։ Բնական է, որ պետք է հաշվի առնենք շահագրգիռ կողմերի դիրքորոշումները»,- ասել է Լավրովը։
Նա նաև նշել է, որ ՌԴ-ն սատարում է բիզնեսին, որը պատրաստ է աշխատել Լեռնային Ղարաբաղում։
«Խրախուսում ենք մեր ընկերություններին՝ մասնակցել վերականգնման աշխատանքներին, ծրագրերին, որոնք պլանավորել եք»,- ասել է Լավրովը։
ՌԴ ԱԳ նախարարը կարծիք է հայտնել, որ Հարավային Կովկասում տրանսպորտային հանգույցի ստեղծումը կարող է հիմք հանդիսանալ Բաքվի ու Երևանի հարաբերությունների բարելավման համար։
«Մենք անկեղծորեն հետաքրքրված ենք Ադրբեջանի ու Հայաստանի միջև հարաբերությունների կարգավորման հարցում։ Համարում ենք, որ տնտեսական հարցերի շուրջ համատեղ աշխատանքը ստեղծում է օպտիմալ շրջանակ։ Մարդիկ պետք է զգան, որ այդ պրոցեսն ընթանում է, «գետնի վրա» իրական բարելավում է։ Ռուսաստանի, Ադրբեջանի ու Հայաստանի փոխվարչապետները երեք երկրների ղեկավարների կողմից ստեղծված աշխատանքային խմբում պարբերաբար հանդիպում, քննարկում են գործնական ասպեկտները՝ կապված Հարավային Կովկասում տնտեսական ու տրանսպորտային բոլոր կոմունիկացիաների ապաշրջափակման հետ»,- ասել է Լավրովը՝ հավելելով, որ դա լուրջ տրանսպորտյին հանգույց է, որն իր ազդեցությունը կունենա տարածաշրջանի սահմաններից դուրս։
Էմմա Չոբանյան
