14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Շիրակում հարգանքի տուրք են մատուցել Հայոց ցեղասպանության զոհերի հիշատակին․ ԼՈՒՍԱՆԿԱՐՆԵՐ
Հասարակություն
24.04.2021 | 17:17
Շիրակի մարզում հարգանքի տուրք են մատուցել Հայոց ցեղասպանության զոհերի հիշատակին։ Մարզպետ Հովհաննես Հարությունյանը, Գյումրու քաղաքապետ Սամվել Բալասանյանը մարզային ու քաղաքային իշխանությունների ներկայացուցիչների, դիվանագիտական և ուժային կառույցների ղեկավարների, մտավորականների ու հյուրերի հետ Ցեղասպանության զոհերի հիշատակի օրվա կապակցությամբ այցելել են Հերհերի՝ Ջարդի ձոր, հարգանքի տուրք մատուցել Հայոց ցեղասպանության զոհերի հիշատակին: Ծաղկեպսակ և ծաղիկներ են դրվել հուշակոթողին։
Շիրակի մարզպետը նշել է, որ պետք է հաստատակամորեն շարունակել պայքարը Ցեղասպանության միջազգային ճանաչման համար, քանի որ միայն միջազգային ճանաչմամբ է հնարավոր կանխարգելել նման տեսակի ոճրագործությունները։
«Իսկ այն, ինչ տեղի ունեցավ 2020 թվականի Արցախյան պատերազմին` կրկին փաստեց հայատյաց քաղաքականության մասին։ Բայց մեր կամքն ամուր է և ապագայի հանդեպ հավատով պետք է շարունակենք մեր պայքարը»,- ասել է Հովհաննես Հարությունյանը։
Քաղաքապետ Սամվել Բալասանյանը ևս խոսել է Հայոց ցեղասպանության ճանաչման կարևորության մասին։ «Պետք է պայքարենք, ամբողջ աշխարհին միշտ հիշեցնենք ոճրագործության մասին և կարողանանք հասնել ցեղասպանության ճանաչմանը: Ճիշտ է շատ բարդ է, շատ դժվար է, բայց պետք է պայքարենք»,- ասել է Բալասանյանը:
Առավոտյան էլ Գյումրու Սուրբ Յոթվերք եկեղեցում մատուցվել է հոգեհանգստի պատարագ՝ ի հիշատակ անմեղ զոհերի: Պատարագից հետո էլ մարզային ու քաղաքային իշխանության ներկայացուցիչները քայլել են դեպի «Վերածնունդ» հուշակոթող՝ ծաղիկներ խոնարհել ու հարգանքի տուրք մատուցել Հայոց ցեղասպանության անմեղ զոհերի հիշատակը հավերժացնող «Վերածնունդ» հուշակոթողին:
