Կեղտը մինչև չլցնես գլխներին չեն հասկանա. Միայնակ Գայլը` ավագանու ծեծկռտուքի մասին

Այսօր Շենգավիթ վարչական շրջանի դատարանում մեկնարկեց «Սասնա ծռերի» տասը անդամների գործով դատական նիստը: Պաշտպաններից շատերը ներկա չէին դատական նիստին, նրանցից ոմանք գործադուլ են հայտարարել ընդդեմ 100 հազար դրամով տուգանքների սանկցիաների: Արայիկ Խանդոյանը դատարանում ելույթ ունեցավ՝ նշելով, որ ողջունում է իր պաշտպանների քայլը, ապա անդրադարձավ երեկ ավագանու նիստում տեղի ունեցած միջադեպին. «Երեկվա էն աղջկա ցավը տանեմ: Դրանք իմ ժողովրդին կեղտի մեջ են պահում ու մինչև չբերես լցնես գլխներին դրա համն ու հոտը չեն զգա»:

Պավել Մանուկյանը ևս ողջունեց Մարինա Խաչատրյանի քայլը. «Ողջունում եմ այդ խիզախ քայլը, այն ինչ երեկ տեղի ունեցավ ցույց տվեց, որ ժողովուրդը տարիներ շարունակ բռնապետության մեջ է ապրում»:

Փաստաբանների բացակայությամբ նիստին մասնակցել չցանկացավ Վարուժան Ավետիսյանը, իսկ երբ մեղադրողը փորձեց ելույթ ունենալ ամբաստանյալ Գագիկ Եղիազարյանը սկսեց տեղից խոսել, դատավորը մի քանի անգամ զգուշացնելուց հետո, սանկցիա կիրառեց և Եղիազարյանին քսան ժամով հեռացրեց դահլիճից: Մեղադրողը պահանջեց հանրային պաշտպաններ ներգրավել գործին և նիստը շարունակել:

Ելույթ ունեցավ նաև փաստաբան Հարություն Բաղդասարյանը՝ նշելով, որ դատական նիստը պետք է հետաձգվի, որպեսզի մարդկանց պաշտպանական իրավունքից չզրկեն: Նա դատարանից պահանջեց, որպեսզի վերջինս էլ պահանջի փաստաբաններին տուգանելու օրենքը հետ կանչել: Նա դատարանում հայտարարեց, որ ինքն էլ է գործադուլի մեջ և եկել է միայն հայտարարություն անելու համար, ապա լքեց դահլիճը: Պավել Մանուկյանն ասաց որ միանում է փաստաբանի կոչին. «Այդ օրենքը ընդունել են ծռերի փաստաբաններին ծռելու համար, բայց դա չի ստացվի: Կոչ եմ անում դուք էլ միանաք փաստաբանների պահանջին»:

Մյուս ամբաստանյալները ևս ողջունեցին պաշտպանների գործադուլը: Դատավոր Մեսրոպ Մակյանը բոլորին լսելուց հետո ասաց, որ չի ողջունում փաստաբանների այս քայլը, քանի որ գործի քննությունը ողջամիտ ժամկետներում չի իրականանա. «Դատարանը ստեղծված իրավիճակում չի շարունակի դատական նիստը, բայց պետք է քայլեր ձեռնարկել որպեսզի գործի քննությունն իր ժամանակին իրականանա»:

Դատավորը հայտարարեց, որ գործին կներգրավվեն հանրային պաշտպաններ, նիստը մեկ շաբաթով հետաձգվեց:

Լիլիթ Շաբոյան