Չի կարելի ամենաթողություն, այլապես Ալիև և թուրք պետք չէ, ինքներս կտանք Մեղրին էլ, Երևանն էլ․ Արամ Սարգսյան․ ՏԵՍԱՆՅՈՒԹ

Նախընտրական պայքարի, Հայաստանի իրավիճակի, սպասելիքների մասին Factor TV-ն զրուցել է «Հանրապետություն» կուսակցության նախագահ Արամ Սարգսյանի հետ

-Ամեն ինչ գնում է նրան, որ համամասնական ընտրակարգով է անցկացվելու արտահերթը։ Այսօրվա ընտրապայքարի համատեքստում տեսնո՞ւմ եք, որ ծրագրերի պայքար։ Եվ մեր ընտրողները պատրա՞ստ են դրան։

-Մենք ասել ենք՝ եթե անվտահության, կասկածի խնդիր կա, այս իրավիճակի միակ ելքը տեսել ենք արտահերթ ընտրությունների միջոցով։ Եվ այսօր էլ գտնում ենք, որ դա լավագույն մեթոդը չէ։ Այնպես չէ, որ ընտրություններից հետո ամեն ինչ իր տեղն է ընկնելու։ Բայց այլ տարբերակ ես չեմ տեսնում։

Այն տարբերակները, որ կիրառվեցին Ազատության հրապարակում, հետո Բաղրամյան և Դեմիրճյան փողոցներում՝ շրջափակելով, և երեկ՝ Սյունիքում, իմ համար անհասկանալի է։ Ցանկացած մարզում էլ կան մարդիկ, որ իշխանություններին դեմ են, բայց մեր ժողովուրդը պիտի մի բան լավ հասկանա՝ ժողովրդավարությունն ու ամենաթողությունը տարբեր բաներ են։ Չի կարելի խնդիրը հասցնել ամենաթողության, առավել ևս՝ պատերազմող երկրում, դա բացարձակ արգելված է ու վտանգավոր։ Եթե մենք ինքներս չհարգենք մեզ, չհարգենք օրենքը, պետությունն ու պետականությունը, մեզ ոչ մի թշնամի, ոչ մի Ալիև, ոչ մի թուրք պետք չէ, մենք ոչ միայն Մեղրին կտանք․․․ Երևանն էլ կտանք, ամեն ինչ էլ կտանք, կկորցնենք ու կգնանք։

-Քաղաքական առճակատումը, կարծես, սրվեց, եղան ցույցեր նաև Երևանում։ Եվ, ընդհանրապես, լարված է քաղաքական մթնոլորտը։ Ընտրությունները կարո՞ղ են լուծել այս հարցը։

-Եթե ընտրությունները չեն լուծում այդ խնդիրը, ապա չկա որևէ տարբերակ, որը լուծում է։ Ընտրություններն ամենալավ ձևը չեն, բայց դրանից ավելի լավ ձև գոյություն չունի։ Եթե այդ ընտրությունները եղան անարդար, չի հանգուցալուծվելու, եթե լինեն բիրտ ուժով, չի հանգուցալուծվելու։ Բանավեճը պետք է լինի փողոցում, իրար հրմշտելով կամ իրար կապիտուլյանտ ու մերժված անվանելով, այլ պիտի լինի քաղաքակիրթ դաշտում՝ դեբատում։ Ես կուզենամ այդ դեբատին մասնակցել, կուզենամ այդ դեբատը լսել։

Հարցազրույցը ամբողջությամբ՝ տեսանյութում։

Գարիկ Հարությունյան