Վերջին պահին, գուցե, մի բան պատահի․ Հարութ Սասունյանը՝ Բայդենի ուղերձի մասին․ ՏԵՍԱՆՅՈՒԹ

Factor TV-ի հարցազրույցը «Կալիֆորնիա Կուրիեր» թերթի հրատարակիչ և խմբագիր Հարութ Սասունյանի հետ

– Մինչ ԱՄՆ-ում նախագահական ընտրությունները նշել էիք, որ Ձեր քվեն տալու եք Ջո Բայդենին՝ շեշտելով, որ այնքան լավատես չեք, որ հավատաք տված խոստումներին։ Ամիսներ անց, հետևելով Բայդենի  վարած քաղաքականությանը, Ձեր լավատեսությունն ավելացե՞լ է։

-Տակավին ես մնում եմ լավատես, բայց չեմ կարող վստահ լինել, թե Բայդենն ինչ է անելու։ Թեև միջազգային մամուլն ասում է, որ իրենք իմացել են, որ Բայդենը «ցեղասպանություն» բառն օգտագործելու է, բայց քանի որ մենք անցյալում հաճախ ենք հուսախաբվել, չեմ ուզում մեկ անգամ ևս հուսախաբ լինել։ Դրա համար փորձում եմ լինել զգույշ, և մեկ օր սպասենք, տեսնենք՝ ասելու՞ է, թե՞ ոչ։

– Մամուլը նախկինում երբեք այդքան վստահ ու ակտիվ չի գրել այդ մասին, ինչո՞վ է դա պայմանավորված։

-Միջազգային թերթերը, որ այդ մասին գրում են, օդից չէ, որ գրում են։ Աղբյուրներ ունեն Սպիտակ տանը կամ Պետքարտուղարությունում և իրենց աղբյուրներից են լսում այդ խոսքերը, բայց միշտ էլ ավելացնում են, որ 100 տոկոս վստահ չեն։ Բայդենը պիտի ասի, բայց վերջին պահին, գուցե, մի բան պատահի։

–Ինչն է փոխվել, որ այս տարի ավելի հավանական է դարձել ԱՄՆ նախագահի կողմից «ցեղասպանություն» բառի օգտագործումը։

-Փոխվել է այն տեսակետից, որ թուրքական կառավարությունը, որ ՆԱՏՕ-ի անդամ է, վերջին շրջանում սերտորեն համագործակցում է Ռուսաստանի հետ, հրթիռներ է գնել, և ամերիկյան կառավարությունը խիստ դժգոհություն է հայտնել՝ կոչ անելով ազատվել այդ հրթիռներից։ Նաև ընդհանրություններ կան Սիրիայի վերաբերյալ։  Նախագահ Թրամփը սիրահարվել էր Էրդողանին և շաբաթը 3 անգամ զանգում, խոսում էին։ Հենց զանգում էր՝ Թրամփն «ալո» էր ասում՝ առանց խորհրդակցելու։ Իսկ Բայդենը նոյեմբերի 3-ի ընտրությունից հետո զանգել է զանազան նախագահների, բայց չի զանգել Էրդողանին։ Էրդողանը ինքն է զանգել Բայդենին 5-6 ամիս առաջ, բայց Բայդենը երբեք չի պատասխանել Էրդողանի զանգերին։ Դա ևս զայրացնում է Էրդողանին, քանի որ նա ինքնահավան է և կարծում է, որ ամենակարևոր երկիրը Թուրքիան է և նեղացած է, որ Բայդենն իրեն անտեսում է։

Հարցազրույցն ամբողջությամբ՝ տեսանյութում։

Իրինա Մկրտչյան