25.02.2026 | 10:03
Արտարժույթների փոխարժեքները՝ փետրվարի 25-ի դրությամբ
Կռնատ կնոջ որդուն ազատեցին բանակից. Factor.am-ի հրապարակումն անարձագանք չմնաց
Հասարակություն
13.02.2018 | 19:48
Ավտովթարի հետևանքով հաշմանդամ դարձած Ռուբեն Պապոյանը, որը 18 տարեկան է, ձմեռային զորակոչի ժամանակ ճանաչվել էր պիտանի զինվորական ծառայության համար և 2018 թվականի հունվարի 29-ին նրան կանչել էին Արաբկիրի զինկոմիսարիատ: Նա չէր ներկայացել, քանի որ Ռուբենի մայրը՝ Սվետլանա Պապոյանը, հաշմանդամ է. ի ծնե զրկված է մեկ ձեռքից:
Միայնակ մոր կարգավիճակ ունեցող կինը չի կարողանում աշխատանք գտնել: Ընտանիքի միակ աշխատողը Ռուբեն Պապոյանն է, որի մի ոտքը մյուսից կարճ է: Զինկոմիսարիատից ծանուցագիր ստանալուց հետո Սվետլանան հայտնվել էր անելանելի վիճակում: Նա գտնում է, որ իր հաշմանդամությունը նաև որդու ստացած վնասվածքները բավարար հիմք են նրան զինվորական ծառայությունից ազատելու համար:
Factor.am -ը հունվարին անդրադարձել էր ընտանիքի խնդրին, («Կռնատ կնոջ միակ կաղ որդուն տանում են բանակ») և բազմաթիվ արձագանքներ ստացել մասնավոր անձանցից, որոնք ուզում էին օգնել կռնատ կնոջն ու նրա որդուն: Պետական մարմինները ևս արձագանքեցին:
Այսօր տեղեկացանք, որ Ռուբեն Պապոյանին տարկետման իրավունք է տրվել: «Մարդու իրավունքների գրասենյակը գրություն է ստացել Պաշտպանության նախարարությունից, որ Ռուբեն Պապոյանն ընտանեկան դրության բերումով տարկետում է ստացել մինչև 2020 թվականը», – հայտնեց ՀՀ մարդու իրավունքների պաշտպանի աշխատակազմի հանրային կապերի բաժնի պետ Նունե Հովսեփյանը:
Իսկ պաշտպանության նախարարի մամուլի քարտուղար Արծրուն Հովհաննիսյանը պարզաբանեց. «Ռուբեն Պապոյանը վաղուց է Արաբկիրի զինկոմիսարիատի կողմից օրենքով սահմանված կարգով ներկայացված եղել տարկետման: Անկախ մամուլի հրապարակումներից, նրա հարցը լսվելու էր: Վերջնական որոշումը կայացվել է օրերս, վերջին նիստի ժամանակ: Նա տարկետում է ստացել՝ ելնելով ընտանեկան դրությունից»:
Նկատենք, որ ավելի վաղ՝ Factor.am-ի հարցմանն ի պատասխան ՊՆ-ն գրություն էր ուղարկել հետևյալ բովանդակությամբ. «Տեղեկատվություն տրամադրելու համար անհրաժեշտ է հստակեցնել Ռուբեն Պապոյանի ծննդյան տարին և զորակոչի հանգամանքը, քանի որ 1991 թվականին ծնված Ռուբեն Պապոյան անունով ու ազգանունով անձ 29.01.18 թվականին պարտադիր զինվորական ծառայության չի զորակոչվել»:
Ստացվում է, որ ՊՆ-ն զբաղվում էր Պապոյանի գործով և միաժամանակ նրա մասին տեղեկություն չուներ: Սվետլանա Պապոյանը որդու ծառայությունից ազատման մասին տեղեկացել է այսօր՝ ՄԻՊ գրասենյակից և սպասում է նաև գրավոր պատասխանի:
«Որդուս առողջական վիճակը բավարար են համարել սահմանափակումներով ծառայության համար: Հաշվի են առել միայն մեր ընտանիքի սոցիալական վիճակը, որ ես ձեռք չունեմ, որ քույրս հաշմանդամ է», – ասում է Սվետլանան:
Նկատենք, որ այս ընտանիքը բոլոր առումներով դուրս էր պետական մարմինների ուշադրությունից: Օմբուդսմենի աշխատակազմը նրա գործերը ուսումնասիրելիս նկատել էր, որ Սվետլանա Պապոյանը դասված է հաշմանդամության երրորդ խմբին և նրան ամենաթեթև՝ երրորդ կարգն է տրված, այն դեպքում, երբ նա ձեռք չունի: Մեր տեսանյութի հեռարձակումից հետո ՄԻՊ գրասենյակի միջամտությամբ նրա նկատմամբ նոր բժշկասոցիալական հետազոտություն է նշանակվելու:
Սյուզան Սիմոնյան
