17.09.2026 | 13:10
«Հույսը ծրագիր չէ»․ ՄԹ դեսպանը՝ Հայաստանի անվտանգության և դիմակայունության մասին․ ՏԵՍԱՆՅՈՒԹ
Զանգվածային ցույցերի նախաշեմին ՌԴ տարբեր քաղաքներում ձերբակալում են Ալեքսեյ Նավալնիի կողմնակիցներին
Քաղաքականություն
21.04.2021 | 13:04
Ոստիկանությունը տաքսիից դուրս է բերել ազատազրկման մեջ գտնվող ռուս ընդդիմադիր գործիչ Ալեքսեյ Նավալնիի մերձավոր Լյուբով Սոբոլին և տարել անհայտ ուղղությամբ։ Այս մասին հայտնել է նրա փաստաբան Վլադիմիր Վորոնինը, գրում է BBC-ի ռուսական ծառայությունը:
Դեպքը տեղի է ունեցել Մոսկվայում՝ «Ավտոզավոդսկայա» մետրոյի կայարանի մոտակայքում: Պատճառը հայտնի չէ:
Հունվարի 23-ին կայացած հանրահավաքից հետո Սոբոլին մեղադրում են «սանիտարահամաճարակային կանոնները խախտելու մեջ»: Հանրահավաքից հետո նա գտնվում էր տնային կալանքի տակ, սակայն ապրիլի սկզբին դատարանը փոխել է նրա խափանման միջոցը՝ որոշակի արգելքներ սահմանելով:
Սանկտ Պետերբուրգի օրենսդիր ժողովի պատգամավոր Մաքսիմ Ռեզնիկը ևս հայտնել է, որ իրեն սպառնում են թմրանյութերի գործով մեղադրանք առաջադրել, եթե չքննադատի ապրիլի 21-ի բողոքի ցույցերը: Նա պատմել է, որ փողոցում իրեն են մոտեցել քաղաքացիական հագուստով 2 անձինք, խնդրել են նստել ավտոմեքենան, ինչից հետո սպառնացել են քրեական հետապնդումով։
Միաժամանակ, երեքշաբթի օրվանից ՌԴ տարբեր քաղաքներում շարունակվում են Ալեքսեյ Նավալնիի կողմնակիցների ձերբակալությունները: Այսպես՝ Կազանում ծայրահեղականության դեմ պայքարի կենտրոնի աշխատակիցները բերման են ենթարկել Նավալնիի շտաբի կամավոր Անդրեյ Բոյարշինովին: Նա մեղադրվում է ապրիլի 21-ին չարտոնված հանրահավաքի կոչեր անելու մեջ։
Կրասնոդարում էլ դատարանը 10 օրով ձերբակալել է Նավալնիի թիմի ակտիվիստ Ալիպատ Սուլթանբեգովային՝ TikTok-ում առաջիկա բողոք ցույցի մասին հայտարարություն տեղադրելու համար։
Տեղի բնակիչ Կիրիլ Սայենկոն բերման է ենթարկվել Նովոսիբիրսկում՝ «ВКонтакте»-ում հանրահավաքի մասին հայտարարելու համար։ Կուրգանում էլ առավոտյան բերման է ենթարկվել Նավալնիի շտաբի համակարգող Ալեքսեյ Շվարցը, իսկ Բելգորոդում՝ Նավալնիի շտաբի համակարգող Մաքսիմ Կլիմովը:
