24.04.2026 | 18:09
Իրանի ԱԳ նախարարն Իսլամաբադ կայցելի՝ ԱՄՆ-ի հետ խաղաղության բանակցությունները վերսկսելու
Հնարավոր է՝ 61 հազար հայ ստիպված լինի լքել ՌԴ-ն․ ինչ սպասել միգրանտների համար նոր կարգավորումներից․ ՏԵՍԱՆՅՈՒԹ
Քաղաքականություն
20.04.2021 | 21:07
Հնարավոր է՝ առաջիկայում ՌԴ-ում գտնվող մի քանի հազար հայ միգրանտներ ստիպված լինեն լքել այդ երկիրը։ Ռուսաստանի ՆԳ փոխնախարար Ալեքսանդր Գորովոյը ԱՊՀ երկրների ներկայացուցիչներին կոչ է արել օգնել Ռուսաստանում ապօրինի գտնվող իրենց քաղաքացիներին լքել երկիրը։ «Եթե մինչև հունիսի 15-ը մենք ձեզ հետ այդ թիվը չմաքրենք, ինչպես ենթադրում է Ռուսաստանի նախագահի հրամանագիրը, ապա այդ մարդկանց սպառնում են պատիժներ՝ ընդհուպ մինչև Ռուսաստանից արտաքսում և սահմանների փակում։ Ես կցանկանայի, որ դուք ձեր երկրներում ԶԼՄ-ների, բլոգերների հետ քարոզչական աշխատանք անցկացնեիք»,- նշել է Գորովոյը:
ՌԴ ՆԳՆ վիճակագրության համաձայն՝ ներկայում Ռուսաստանում ավելի քան 332 հազար անօրինական միգրանտ կա, 61 հազարը՝ Հայաստանից։ Իշխող «Իմ քայլը» խմբակցության պատգամավոր Գևորգ Պապոյանը, մեկնաբանելով ռուս պաշտոնյայի հայտարարությունը, շեշտում է՝ ամեն ինչ օրինական է, Ռուսաստանն իր քաղաքականությունն է իրականացնում։ Միաժամանակ, պատգամավորը հորդորում է սպասել պաշտոնական պարզաբանման, թե կոնկրետ քանի քաղաքացու է վերաբերելու կարգավորումը։
Ընդդիմադիր «Լուսավոր Հայաստան» խմբակցության պատգամավոր Կարեն Սիմոնյանն էլ կարծում է՝ կարգավորումն ակնհայտորեն խնդիրների առջև է կանգնեցնելու մեր հայրենակիցներին, և այս հարցով պետք է լրջորեն զբաղվել։
Պաշտոնական տվյալներով՝ Ռուսաստանում մոտ 2․5 մլն հայ է ապրում։ Նրանց մի մասը քաղաքացիություն ունի կամ մշտական բնակության իրավունք։ Իսկ անօրինական միգրանտների հարցը պարբերաբար քննարկման առարկա է դառնում։ Քաղաքական մեկնաբան Հակոբ Բադալյանի խոսքով՝ ՌԴ-ում աշխատող հայ միգրանտների խնդիրը բարդ է ու բազմաշերտ, այստեղ առկա են ոչ միայն սոցիալական ու իրավական, այլև քաղաքական հարցեր։
Մանրամասները՝ տեսանյութում։
Մերի Մարտիրոսյան
