Քաղաքականություն
20.04.2021 | 14:14
ԵՄ երկրների ԱԳ նախարարների հանդիպման ժամանակ քննարկվել են միանգամից երեք ռուսական թեմաներ՝ Չեխիայի և Ռուսաստանի հակամարտությունը, ընդդիմադիր գործիչ Ալեքսեյ Նավալնիի առողջական վիճակը և Ուկրաինայի հետ սահմանին ու Ղրիմում ռուսական զորքերի կուտակումը, գրում է DW-ի ռուսական ծառայությունը։
Լրտեսական սկանդալ է բռնկվել Չեխիայի և Ռուսաստանի միջև հանգստյան օրերին, երբ Պրահան արտաքսել է 18 ռուս դիվանագետի: Չեխիայի կառավարությունը վստահ է, որ ՌԴ ռազմական հետախուզությունը կապված է 2014 թվականին Չեխիայում զինամթերքի պահեստում տեղի ունեցած պայթյունի հետ: ԵՄ երկրների արտգործնախարարները կարճ ժամանակ են տրամադրել այս թեմային․ չեխ նախարար Յան Համաչեկը գործընկերներին պատմել է ստեղծված իրավիճակի մասին:
Բրյուսելը սատարել է Պրահային և իր համերաշխությունն հայտնել, հանդիպմանը հաջորդած մամուլի ասուլիսի ժամանակ հայտարարել է Եվրամիության արտաքին հարաբերությունների հարցերի գերագույն հանձնակատար Ժոզեպ Բորելը: Հարցին՝ պատրաստվո՞ւմ են ԵՄ այլ երկրներ վտարել ռուս դիվանագետների՝ ի նշան համերաշխության, նա բացասական պատասխան է տվել՝ պարզաբանելով, որ նման խնդրանք իրեն չի ուղղվել:
Նախարարները քննարկել են նաև Ալեքսեյ Նավալնիի առողջական ծանր վիճակը: Նրանք անբավարար են համարել ընդդիմադրի տեղափոխումը Պոկրովի ուղղիչ գաղութի հիվանդանոց:
«ՌԴ իշխանությունները պետք է անհապաղ հնարավորություն տան, որպեսզի նրա կողմից վստահված բժիշկներն այցելեն նրան»,- ընդգծել է Բորելը։
Նա հերթական անգամ զգուշացրել է Ռուսաստանի իշխանություններին, որ նրանք պատասխանատու են պատիժը կրող Նավալնիի անվտանգության և առողջության համար: Բորելը սպառնացել է, որ ԵՄ-ն «պատասխանատվության կենթարկի» Ռուսաստանի իշխանություններին, եթե ընդդիմադրի վիճակը վատթարանա:
