Աշխարհի պահեստարաններում կուտակված նավթի պաշարները գրեթե սպառվել են․ նավթի գինը կարող է հասնել մինչև 74 դոլարի․ Bloomberg

Համաճարակի ընթացքում ամբողջ աշխարհի պահեստարաններում կուտակված նավթի պաշարները գրեթե սպառվել են, ինչը կարող է այս տարվա երկրորդ կեսին հանգեցնել ինքնարժեքի աճի: Այս մասին գրում է Bloomberg գործակալությունը ՝ վկայակոչելով Էներգետիկայի միջազգային գործակալության տվյալները:

Համաձայն այդ տվյալների ՝ փետրվարին աշխարհի զարգացած տնտեսություններում նավթի պաշարները 57 միլիոն բարելով գերազանցել են 2015-2019 թվականների միջին տվյալները: Միևնույն ժամանակ, դեռևս 2020-ի հուլիսին նավթի ավելցուկային պաշարները գրեթե հինգ անգամ՝ 249 միլիոն բարելով ավելի էին: Ինչպես նշում է Bloomberg-ը, վերջին ամիսներին պաշարներն է՛լ ավելի են նվազել` աճող պահանջարկի ֆոնին:

Ըստ այդ տվյալների՝ այժմ նավթի ամենամեծ պաշարները պահպանվում են Չինաստնում, իսկ ամերիկյան պաշարները գրեթե հավասարվել են մինչ համաճարակը եղած մակարդակին՝ փետրվարին կազմելով 1,28 միլիարդ բարել:

Գործակալությունը նշում է, որ ԱՄՆ Արևելյան ափին, անցած շաբաթ նավթի պաշարները հասել են 30-ամյա նվազագույնին: Միևնույն ժամանակ, վերջին երկու շաբաթվա ընթացքում պահվող նավթի պաշարները նվազել են 27% -ով՝  կազմելով 50,7 մլն բարել:

Լոնդոնի ICE բորսայում հունիսին Brent տեսակի նավթի ֆյուչերսների արժեքը բարձրացել է՝  մեկ բարելի դիմաց հասնելով 67.08 դոլարի: Ինչպես նշում է Bloomberg- ը, 2021-ի երկրորդ կեսին նավթի պաշարների կանխատեսվող կրճատման ֆոնին նավթի գինը կարող է բարձրանալ՝ հասնելով մեկ բարելի դիմաց 74 դոլարի:

Տաթև Ֆռանգյան