Քաղաքականություն
16.04.2021 | 18:16
«Ազատ Եվրոպա / Ազատություն» ռադիոկայան ամերիկյան լրատվական ընկերությունը (РСЕ/РС) հայտարարել է, որ իր մոսկովյան բյուրոն, ի դեմս «Ազատություն» ռադիոկայան ՍՊԸ-ի, դիմել է Մարդու իրավունքների եվրոպական դատարան (ՄԻԵԴ) ՝ խնդրելով կանխել ընկերությունից հսկայական տուգանքների գանձումը՝ «օտարերկրյա գործակալների» մասին օրենքը չպահպանելու մեղադրանքով, գրում է DW-ի ռուսական ծառայությունը:
«Ռուսաստանի իշխանությունների գործողությունները խախտում են մարդու իրավունքների եվրոպական կոնվենցիայի 10-րդ հոդվածով նախատեսված արտահայտվելու և խոսքի ազատության իրավունքը: Դատարանը պարտավոր է միջանկյալ միջոցներ կիրառել, քանի որ եթե դա չարվի,« Ազատություն» ռադիոկայանն ու նրա գլխավոր տնօրենը կարող են անդառնալի վնաս կրել»,- ասված է դիմումի մեջ:
Փաստաթղթում շեշտվում է նաև, որ «Ազատության ռադիոյի հետապնդումը կարող է բացասաբար ազդել Ռուսաստանում այլ անկախ լրատվամիջոցների ճակատագրի վրա»:
2021 թվականի սկզբից «Ռոսկոմնադզոր»-ը կազմել է հարյուրավոր արձանագրություններ ընդդեմ «Ազատություն» ռադիոկայանի և նրա գլխավոր տնօրեն Անդրեյ Շառոյի․ տուգանքների ընդհանուր գումարը գերազանցում է 100 միլիոն ռուբլին:
«Ազատություն» ռադիոկայանի միջնորդագրում նշվում է, որ եթե տույժեր գանձվեն նույն տեմպերով, ապա տարեվերջին դրանց գումարը կհասնի 33 մլն դոլարի, ինչը կարող է հանգեցնել Ռուսաստանում «Ազատություն» ռադիոկայանի բովանդակության արգելափակմանը, Շարոյի անձնական սնանկացմանը և երկու տարվա ազատազրկմանը։
Տաթև Ֆռանգյան
