Տնտեսություն
15.04.2021 | 13:56Այս փուլում հաստատված ներդրումային ծրագիր չունենք «Գազպրոմ Արմենիայի» կողմից, բայց նման միտք կա, ԱԺ-ում ասաց Տարածքային կառավարման և ենթակառուցվածքների նախարար Սուրեն Պապիկյանը՝ պատասխանելով հարցին, թե որպես պետություն ի՞նչ ենք պատրաստ անել երկիրը «ծածկելու» և գազաֆիկացման խնդիրը հիմնավոր լուծելու համար:
«Երբ լինի ներդրումային ծրագիրը, դիտարկում ենք այն համայնքները, որոնք ունեն սպառման պոտենցիալ: Պետք է այդ համայնքների ենթակառուցվածքները նորացնելու կամ եթե չկան այդպիսիք՝ հասցնելու հնարավորություն ստեղծենք», – նշեց նախարարը՝ ընդգծելով, որ չի ուզում «մեզ սահմանափակենք գազով»:
Նրա խոսքով՝ գազաֆիկացումը չէ բարեկեցիկ կյանքը, ջեռուցում ունենալու ճանապարհը. «Այսօրվա տեխնոլոգիաները թույլ են տալիս նաև օգտվել արևային էներգիայից և տարբեր այլ աղբյուրներից»:
Սուրեն Պապիկյանը վերահաստատեց, որ պլանավորում են նոր ատոմակայան ունենալ, բանակցություններ են տարվում ՌԴ-ի հետ:
«Այսօր կամ վաղը կվերադառնան ատոմակայանի տնօրենը և իմ տեղակալը, որոնք Ռուսաստանում են: Առաջարկներ կան նաև այլ երկրներից, – նշեց նախարարը:- Փոքր մոդուլյար ռեակտորով կայաններ կան, բայց դրանք բոլորը ջրի վրա են, հողային հիմքի վրա դեռևս ոչ մի երկիր չունի: Բոլորն իրենց նախագծերը պատրաստակամություն են հայտնել ուղարկելու: Մեր ռազմավարական գործընկերոջ հետ այս հատվածում հաջողություններ ունենք, կարծում ենք, որ փորձված թանն ավելի ճիշտ է այս փուլում»:
«Սյունիքում շարունակվում է կառուցվել Տաթև-Աղվանի դեպի Կապան տանող այլընտրանքային ճանապարհը»,- ընդգծեց Սուրեն Պապիկյանը:
Նա անդրադարձավ նաև այդ ճանապարհահատվածի հետ կապված խոսակցություններին. «Ասում են՝ իմացել ենք, թե ինչ է լինելու, այդ իսկ պատճառով այդ ճանապարհը կառուցում են: Դա լկտի սուտ է: Դա կարող է հավաստել նաև Սյունիքի նախկին մարզպետ Հունան Պողոսյանը: Այդ ծրագիրը հղացել է այն ժամանակ, երբ իրականացվել է դեպի Տաթև տանող ճանապարհի կառուցումը: Սյունիքում գյուղեր կան՝ հասնելու համար ուղղաթիռ է պետք: Ճանապարհ ենք կառուցում, բայց քննադատվում ենք»:
Մանրամասները՝ տեսանյութում:
