18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Կատարյալ անհեթեթություն. Փաշինյանը՝ զորահավաքը դադարեցնելու ու Լելե-Թեփեի գործողության վերաբերյալ մեղադրանքների մասին. ՏԵՍԱՆՅՈՒԹ
Քաղաքականություն
14.04.2021 | 12:16
ՀՀ վարչապետ Նիկոլ Փաշինյանն անհեթեթ է համարում այն խոսակցությունները, թե Արցախյան երկրորդ պատերազմի ընթացքում ինքն է որոշում կայացրել գրավել Վարազաթումբ՝ Լելե Թեփե բարձունքը:
«Այդ հայտարարությունն անհեթեթ է, իսկ հեղինակը մեծ խնդիր ունի։ Խնդիրն այն է, որ երբ նա բարձրաստիճան զինվորական լինելով՝ փորձում էր հանձնել 7-րդ պաշտպանական շրջանը, ես այս դահլիճում ներկա մի շարք մարդկանց ներկայությամբ կայացրել եմ որոշում, որի արդյունքում 7-րդ պաշտպանական շրջանը մինչև այսօր ՀՀ ԶՈՒ տրամադրության տակ է»,- ՀՀ կառավարության ծրագրի կատարման 2020թ․-ի ընթացքի մասին զեկույցի ներկայացման ժամանակ այսօր հայտարարեց ՀՀ վարչապետ Նիկոլ Փաշինյանը՝ անդրադառնալով պատգամավոր Թագուհի Թովմասյանի դիտարկմանը, որ մեղադրանքներ են հնչում, թե պատերազմի օրերին դադարեցվել է զորքերի համալրումը։
Հիշեցնենք՝ ՀՀ ԶՈՒ ԳՇ նախկին պետ Մովսես Հակոբյանը պատերազմից հետո հայտարարել էր, թե Նիկոլ Փաշինյանի հրամանով դադարեցվել է զորքերի համալրումը։
«Ընդ որում, պատերազմի ընթացքում դա միակ ռազմականին մոտ որոշումն է եղել, որը ես կայացրել եմ։ և այդ մարդը, որը կիսահիստերիկ վիճակում անընդհատ հարցազրույց է տալիս և գեներալ-գնդապետի ուսադիրներով իր համար հիմնական «օպոնենտ» է համարում կնոջը, դուք գիտեք՝ ում կնոջը, կարծում եմ՝ նա շատ խնդիրներ ու բարդույթներ ունի։ Նա դեռ հարցերի պետք է պատասխանի»,-ասաց Նիկոլ Փաշինյանը։
«Ասում են, թե ես որոշում եմ կայացրել, որ Սերժ Սարգսյանը հանձնել է, ես ասել եմ գնացեք գրավեք և այդ համատեքստում 700 զոհ է եղել: Կատարյալ անհեթեթություն: Այդ օպերացիայի առաջարկի հեղինակը եղել է գեներալ, այդ առաջարկն ընդունելի է համարել գեներալ, այդ առաջարկը կյանքի կոչելու հնարավորության գնահատումն իրականացրել է գեներալ և որոշումը կայացրել են այնպիսի գեներալներ, որոնք այդ պահին այդ որոշումն իրականացնելու հնարավորությունն ունեցել են: Ես մոդերացիա եմ արել խոսակցությունը և սեփական կարծիք ընդհանրապես չեմ հայտնել: Ամենաբարձրաստիճանին եմ հարցրել, ասել է, որ լավ միտք է, որից հետո գնահատել է իրադրությունը և զեկուցել է, որ այո, դա պետք է և կարելի է անել»,- ասաց Փաշինյանը:
«Իմիջիայլոց, այդ մարդուն կարելի է անվանել 7-րդ պաշտպանական շրջանի արծիվ, թե ոնց էր հազարի տակ ուզում փախներ և բոլորին փախցներ այդտեղից․․․չնայած, արծիվները չեն վազում, ջայլամներն են լավ վազում»,- հեգնեց վարչապետը:
Մանրամասները՝ տեսանյութում:
