Քաղաքականություն
12.04.2021 | 13:20
Կարելի է վերսկսել ԵԱՀԿ համանախագահների հովանու ներքո Հայաստանի և Ադրբեջանի արտգործնախարարների պարբերական հանդիպումների փորձը։ Այս մասին «Կոմերսանտին» տված հարցազրույցում ասել է Ռուսաստանի Դաշնային խորհրդի արտաքին հարաբերությունների հանձնաժողովի նորանշանակ նախագահ Գրիգորի Կարասինը։
«Կարծում եմ, որ նրանք այս աշխատանքում կարող էին օգտակար դերակատարություն ունենալ։ Այդ «եռյակը» ունի փորձ և ամուր արտաքին աջակցություն: Ենթադրվում է, որ կարելի է վերսկսել Հայաստանի և Ադրբեջանի արտգործնախարարների պարբերական հանդիպումների փորձը ԵԱՀԿ համանախագահների հովանու ներքո, ինչը զգալի միջազգային արձագանք կստանար»,- ասել է Կարասինը:
Վերջինս նաև նշել է, որ ԼՂ-ում այժմ հարցերի հիմնական մասը կապված է մարդասիրական խնդիրների լուծման հետ։
«Այժմ հարցերի հիմնական մասը կապված է մարդասիրական խնդիրների լուծման հետ. ռազմագերիների փոխանակման ավարտ, զոհվածների մարմինների վերադարձ և փախստականների բնակության համար պատշաճ պայմանների ստեղծում։
Սուր է դրված ԼՂ ու դրա հարակից շրջանների ականազերծման հարցը։
Իհարկե, շատ բան կախված կլինի նրանից, թե որքան շուտ կողմերի միջև վստահություն կստեղծվի: Կոնկրետ քայլեր արդեն արված են: Ռուսաստանի նախագահի նախաձեռնությամբ քննարկվում են քաղաքական հարցեր, որոնվում են լուծումներ: Փոխվարչապետերի մակարդակով եռակողմ հանձնաժողովը եռանդորեն աշխատում է տնտեսական, տրանսպորտային և նյութատեխնիկական ապահովման խնդիրները քննարկելու համար»,- ասել է Կարասինը։
Տաթև Ֆռանգյան
