ԱՄՆ-ը դիտարկում է ռուս դիվանագետներին արտաքսելու և պատժամիջոցներ կիրառելու հնարավորությունը․ Bloomberg

ԱՄՆ նախագահ Ջո Բայդենի վարչակազմն ավարտել է Ռուսաստանին վերագրվող գործողությունների ուսումնասիրությունը, որոնք, ըստ Վաշինգտոնի, թշնամական են։ Այժմ ուսումնասիրվում է ռուս դիվանագետներին արտաքսելու և պատժամիջոցներ կիրառելու հնարավորությունը: Այս մասին գրում է Bloomberg-ը՝ վկայակոչելով սեփական աղբյուրներին:

Հոդվածում նշվում է, որ «Բայդենի վարչակազմն ավարտել է հետախուզական հետազոտությունը Ռուսաստանի ենթադրյալ չարագործությունների վերաբերյալ, ինչպիսիք են ընտրություններին միջամտությունը և հաքերային հարձակումները SolarWinds-ի դեմ, Միացյալ Նահանգները պատրաստվում է հրապարակել պատասխան քայլերը»:

Գործակալության տվյալներով՝ «հնարավոր գործողությունները կարող են ներառել Ռուսաստանի հետախույզ գործակալների արտաքսումը, որոնք, ենթադրաբար, կարող են գտնվել ԱՄՆ-ում դիվանագիտական քողի ներքո:

Ըստ աղբյուրների՝ ԱՄՆ-ը, մասնավորապես, կարող է պատժամիջոցներ կիրառել Ռուսաստանի ղեկավարությանը մոտ կանգնած անձանց, ինչպես նաև այն գերատեսչությունների դեմ, որոնք կապված են ընտրություններին միջամտելու հետ: Բացի այդ, Վաշինգտոնը կարող է փակ խորհրդակցություններ անցկացնել ռուսական կողմի հետ: Դրանց ժամանակ ԱՄՆ պաշտոնյաները, ենթադրաբար, կցանկանային տեղեկատվություն տրամադրել հետագա գործողությունների մասին, որոնք ԱՄՆ-ը պատրաստ կլինի իրականացնել:

Գործակալությունը նշում է, որ Վաշինգտոնը, միաժամանակ, հույս ունի մի շարք ոլորտներում փոխգործակցել Ռուսաստանի հետ: Դրանք ներառում են Իրանի հետ միջուկային գործարքի շուրջ խորհրդակցությունները, սպառազինությունների վերահսկումն ու կլիմայի փոփոխությանը հակազդումը:

Տաթև Ֆռանգյան