18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
ԵՊՀ հոգաբարձուների խորհրդի նիստը կրկին տապալվել է․ ներկաները կառավարությանը սաբոտաժի մեջ են մեղադրել․ ՏԵՍԱՆՅՈՒԹ
Հասարակություն
01.04.2021 | 17:28
ԵՊՀ հոգաբարձուների խորհրդի այսօր հրավիրված նիստը չի կայացել՝ քվեակազմի բացակայության պատճառով. 32 անդամներից ներկա էին 14-ը:
ԵՊՀ հոգաբարձուների խորհրդի քարտուղար Միքայել Մալխասյանը, խոսելով ստեղծված իրավիճակի մասին, ասաց, որ արդեն տևական ժամանակահատված խորհուրդը բախվում է այս խնդրին, երբ քվեակազմի բացակայության պատճառով տեղի չեն ունենում նիստերը: Նա նշեց, որ երբ ծանուցումն ուղարկվել է ՀԽ-ի անդամներին, նրանց մեծ մասն արձագանքել է, որ ներկա է լինելու նիստին, ընդ որում, Միքայել Մալխասյանի տեղեկացմամբ, ծանուցման մեջ հստակ նշվում է վերջնաժամկետը, թե անդամները մինչև երբ պետք է տեղեկացնեն նիստին մասնակցելու կամ բացակայելու վերաբերյալ:
«Միայն այսօր առավոտյան անդամների մեծ մասը տեղեկացրել է, որ չի կարող գալ, ընդ որում՝ նրանցից ոմանք այն անդամներն են, որոնք արդեն հաստատել էին իրենց մասնակցությունը նիստին: Նշված ժամկետում արձագանքել է միայն ՀՀ արտաքին գործերի նախարարի տեղակալ Արտակ Ապիտոնյանը»,- փաստեց Միքայել Մալխասյանը:
ԵՊՀ հեռահաղորդակցության և ազդանշանների մշակման ամբիոնի պրոֆեսոր Արսեն Հախումյանը, իմանալով, որ նիստին ներկա են միայն համալսարանական անդամները, հետաքրքրվեց՝ արդյո՞ք սա սաբոտաժ չէ, և զարմանք արտահայտեց այդ առնչությամբ:
ԵՊՀ ՈՒԽ նախագահ Դավիթ Ափոյանն արձանագրեց, որ նիստը տապալված է լիազոր մարմնի կողմից առաջադրված անդամների պատճառով, և համոզմունք հայտնեց, որ պատճառը նրանց հետաքրքրող հարցի բացակայությունն է: Նրա կարծիքով, սա ցույց է տալիս, որ համալսարանների ՀԽ-ների կազմում կառավարության կողմից ընդգրկված անդամները ներկայացված են ոչ թե բուհի խնդիրները լուծելու, այլ իրենց քաղաքական շահերը սպասարկելու համար:
ԵՊՀ կառավարման և գործարարության ամբիոնի վարիչ Կառլեն Խաչատրյանը նշեց, որ այս վերաբերմունքը վրդովեցուցիչ է: Չներկայացած անդամների քայլը, ըստ Կառլեն Խաչատրյանի, ոչ միայն անարգանք է ՀԽ-ի մյուս անդամների, այլև ամբողջ կոլեկտիվի և բուհի նկատմամբ: Նա կոչ արեց գործընկերներին վերադառնալ կառուցողական դաշտ և համատեղ քննարկումների միջոցով լուծել խնդիրները: Կառլեն Խաչատրյանի գնահատմամբ նույնպես տեղի ունեցածը սաբոտաժ է:
Մանրամասները՝ տեսանյութում:
