18.01.2026 | 21:30
Վահագն Խաչատուրյանն այցելել է Ժնևի Սուրբ Հակոբ եկեղեցի
Բայդենն առաջարկել է ձևափոխել ԱՄՆ տնտեսությունը՝ 2 տրիլիոն դոլար ներդնելով
Քաղաքականություն
01.04.2021 | 20:44
ԱՄՆ նախագահ Ջո Բայդենն առաջարկել է հակազդել Չինաստանի տնտեսական աճին ու ձևափոխել Միացյալ Նահանգների՝ աշխարհում խոշորագույնը համարվող տնտեսությունը՝ ներդնելով Հանրապետականների քննադատությանն արժանացած ծրագիրը, որը ենթադրում է ենթակառուցվածքների՝ ավելի քան 2 տրիլիոն դոլար արժողությամբ ֆինանսավորում: Այս մասին հայտնում է Reuters-ը։
Բայդենի «Ամերիկյան աշխատանքների ծրագրի» շրջանակում նախատեսվում է միլիոնավոր աշխատատեղեր ստեղծել՝ ենթակառուցվածքների ստեղծման, կլիմայի փոփոխության դեմ պայքարի, ծառայությունների և այլ ոլորտներում։
«Սա Ամերիկայի տնտեսության մեջ մեկանգամյա ներդրում է, այն ամենի, ինչ մենք տեսել կամ արել ենք տասնամյակներ առաջ՝ միջպետական մայրուղային համակարգը և տիեզերական մրցավազքը կառուցելուց ի վեր»,- հայտարարել է Բայդենը:
Նա նաև նշել է, որ խնդիր չի տեսնում օրինագծեր ընդունելու հարցում, և այդ օրինագծերով «վերջ կտա» Amazon.com Inc-ին և այլ խոշոր ընկերություններին, որոնք չնչին պետական հարկեր են վճարում։
Հավելենք, որ նոր ծրագիրը ներառում է 621 միլիարդ դոլար՝ ենթակառուցվածքների, կամուրջների, մայրուղիների և նավահանգիստների վերակառուցման համար, և 174 միլիարդ դոլարի պատմական ներդրում էլեկտրական տրանսպորտային միջոցների շուկայում, որի նպատակը մինչև 2030 թվականը լիցքավորման համացանցային ցանց կառուցելն է: Էկոլոգիապես կայուն տներ կառուցելու և վերակառուցելու համար նախատեսված է 213 միլիարդ դոլար հատկացնել, ինչպես նաև հարյուրավոր միլիարդներ՝ ԱՄՆ արտադրությանը աջակցելու, երկրի էլեկտրական ցանցն ամրապնդելու, երկրում գերարագ ինտերնետային ցանց ստեղծելու և երկրի խմելու ջրի համակարգերը նորացնելու համար:
Տաթև Ֆռանգյան
