27.04.2026 | 23:12
Չեխիան Ադրբեջանին նոր մարտական ուսումնական ինքնաթիռ է առաջարկում
Ցուցարարների պահանջով Վլադիմիր Պոզները ստիպված է եղել լքել Թբիլիսին․ Պեսկովը Վրաստան այցելությունը վտանգավոր է անվանել
Քաղաքականություն
01.04.2021 | 16:40
Ռուսասատանցի հայտնի լրագրող Վլադիմիր Պոզները լքել է Թբիլիսին՝ այնտեղ սկսված աղմկոտ բողոքի ցույցերից հետո։ Պոզներն ու նրան ուղեկցող անձինք Վրաստանից հեռացել են Georgian Airways ավիաընկերության չարտերային թռիչքով։
«Նովոստի-Գրուզիա»-ի հաղորդմամբ՝ Պոզները ստիպված է եղել հյուրանոցը լքել ոստիկանության հսկողության ներքո։ Հյուրանոցի դիմաց, որտեղ նա իջևանել էր, ամբողջ գիշեր իրենց բողոքն են հայտնել քաղաքացիական ակտիվիստներն ու ընդդիմադիր քաղաքական գործիչները, որոնք անընդունելի են համարել Պոզների կողմից ավելի վաղ արված հայտարարությունները Աբխազիայի վերաբերյալ։
Ցուցարարները պահանջել են, որպեսզի նա անմիջապես լքի երկիրը, քանի որ չի ճանաչում Վրաստանի տարածքային ամբողջականությունը։ Լուսադեմին ցուցարարները ձվեր են շպրտել Պոզներին և նրան ուղեկցողներին օդանավակայան տեղափոխող ավտոբուսի վրա։
ՏԱՍՍ-ի հաղորդմամբ՝ ՌԴ նախագահի խոսնակ Դմիտրի Պեսկովն անդրադարձել է այս միջադեպին՝ նշելով, որ ռուսները պետք է հստակ հասկանան, որ Վրաստան այցելություններն իրենց համար վտանգավոր են։
ՌԴ ԱԳՆ պաշտոնական ներկայացուցիչ Մարիա Զախարովան նույնպես մեկնաբանել է կատարվածը:
«Ժողովրդավարության ուղիները քաղաքակիրթ չեն. մենք գնում ենք դժվարին ճանապարհով դեպի զմրուխտե քաղաք»,- Ֆեյսբուքում գրել է Զախարովան:
Տաթև Ֆռանգյան
