ԵՏՄ անդամ երկրները պայմանավորվել են շաքարի ներմուծման արտոնյալ ռեժիմ սահմանելու շուրջ

Եվրասիական տնտեսական միության (ԵՏՄ) անդամ երկրների ներկայացուցիչները քննարկել են շաքարի ներմուծման արտոնյալ ռեժիմ սահմանելու հարցը՝ համաձայնեցնելով դրա կարճաժամկետ բնույթը և պայմանավորվելով պահպանել շաքարի միասնական շուկան ԵՏՄ-ում՝ առանց որևէ սահմանափակումների, գրում է Ինտերֆաքսը:

«ԵՏՄ անդամ երկրների ներկայացուցիչները պայմանավորվել են, որ Ղազախստանի Հանրապետությանն ու Ղրղզստանի Հանրապետությանը երրորդ երկրներից սպիտակ շաքարի, ինչպես նաև շաքարի հումքի ներմուծման արտոնությունների տրամադրումը կարճաժամկետ կլինի», – ասված է ԵՏՀ առևտրի բլոկի տարածած հայտարարության մեջ։

«Որոշումն ուղղված կլինի բացառապես ընթացիկ գյուղատնտեսական սեզոնում պահեստային պաշարների ձևավորմանը: Միևնույն ժամանակ, միջոցառման ժամանակացույցը և չարորոշիչները կապահովեն Միության տարածքում շաքարի ճակնդեղի արտադրությունը խթանող պայմանների անխուսափելի պահպանմանը»,- նշել է ԵՏՀ առևտրի նախարար Անդրեյ Սլեպնևը:

Տեղեկացվում է, որ այս հարցը կդիտարկվի ապրիլի 5-ին կայանալիք ԵՏՀ խորհրդի նիստի ժամանակ։ Մինչ այդ, կողմերը կշարունակեն խորհրդակցությունները համապատասխան արտոնությունների հստակեցման համար։

Շաքարի արտոնյալ ներմուծման հարցի քննարկումը նախաձեռնել է ռուսական կողմը: Անցյալ շաբաթ մաքսային և սակագների կարգավորման ենթահանձնաժողովը որոշում կայացրեց ԵՏՀ ուղարկել առաջարկ՝ 2021 թվականի մայիսի 15-ից սեպտեմբերի 1-ը 350 հազար տոննա շաքարի ներմուծման տուրքը հանելու մասին: Ավելի ուշ հաղորդվեց, որ խոսքը ներմուծման արտոնության մասին է, որը կտրամադրվի գյուղատնտեսության նախարարության կողմից ներմուծվող ապրանքների նպատակային նշանակությունը հաստատելուց հետո: Արտոնությունների չափորոշիչները չեն նշվել:

Ներկայում սպիտակ շաքարի ներմուծման տուրքը մեկ տոննայի դիմաց 340 դոլար է:

Տաթև Ֆռանգյան