11.09.2026 | 11:00
Կառավարության նիստը. ՈւՂԻՂ
Քովիդի թվերի աճը կապ չունի վարչապետի մարզային այցերի հետ․ Նարեկ Զեյնալյան. ՏԵՍԱՆՅՈՒԹ
Հասարակություն
01.04.2021 | 14:49
«Կովիդի թվերը սկսել են աճել մեկ ամիս առաջ, և դա պայմանավորված չէ վարչապետի մարզեր այցելություններով: Քարոզարշավ տեղի չի ունենում, ընդամենը վարչապետի այցելություններն են տարբեր մարզեր, քաղաքներ»,- այս մասին լրագրողների հետ զրույցում ասաց ԱԺ առողջապահության և սոցիալական հարցերի հանձնաժողովի նախագահ Նարեկ Զեյնալյանը՝ անդրադառնալով դիտարկմանը, որ երկրում քարոզարշավ է տեղի ունենում, իսկ քաղաքացիները հանդիպումների ժամանակ չեն պահպանում հակահամաճարակային կանոնները՝ առանց դիմակ են, սոցիալական հեռավորություն չեն պահպանում։
«Արվում է առավելագույնը, որպեսզի կառավարելի լինի կորոնավիրուսի տարածումը։ Այս ընթացքում առողջապահական համակարգն է վերակազմակերպվել։ Այս պահին 20 բուժհաստատություն ներգրավված է բուժօգնության պրոցեսի մեջ, պոլիկլինիկաներն իրենց ամբողջ թափով իրականացնում են իրենց առջև դրված գործառույթները»,- նշեց Զեյնալյանը՝ հավելելով, որ բնակչության զգոնությունը ևս շատ կարևոր է։
Հարցին՝ արդյոք հնարավո՞ր է, որ իշխանությունը հետ կանգնի ընտրությունների գնալու որոշումից, հաշվի առնելով՝ համավարակի տարածման առավել մտահոգիչ պատկերը, Նարեկ Զեյնալյանն ասաց. «Եկեք կանխատեսումներ չանենք։ Ամեն ինչ էլ հնարավոր է։ Այս պահին նման մտավախություն չկա, շարժվում ենք՝ ըստ նախանշված օրակարգի։ Եթե լինի այնպիսի իրավիճակ, որ անհրաժեշտություն առաջանա կանգնեցնել ընտրական պրոցեսը, ապա միգուցե նաև այդ քայլի գնանք»։
Լրագրողի դիտարկմանը, որ Հայաստանում օրական 1000-ից ավելի դեպքեր են գրանցվում, Զեյնալյանն ասաց. «Եթե դեպքերի թիվն աճի այնքան, և դրա արդյունքում վերլուծություն արվի, որ կառավարելի չի համաճարակը, այդ պահին կկայացվի համապատասխան որոշում»։
Մանրամասները՝ տեսանյութում:
