Ռեյտինգային ընտրակարգը բերում է նրան, որ Հայաստանում մշտապես մի քաղաքական ուժ մնա իշխանության. Արարատ Զուրաբյան

ԱԺ «Ծառուկյան» խմբակցության պատգամավոր, ՀՀՇ վարչության նախագահ Արարատ Զուրաբյանը Factor.am-ի հետ զրույցում չի բացառում հեռանկարը, որ «Ծառուկյան» դաշինքը կարող է կոալիցիա կազմել ՀՀԿ-ի և ՀՅԴ-ի հետ, սակայն դա անցանկալի է համարում:

«Կյանքում ոչինչ չեմ կարող բացառել: Ճիշտն ասած, գտնում եմ, որ շատ քիչ հավանական է նման բան: Ինքս չեմ ողջունում նման կոալիցիայի ձևավորման գաղափարը, բայց ոչ ոք չի կարող այսօր ասել, թե ինչ կլինի վաղը»,- ասաց Զուրաբյանը՝ շարունակելով. «Միգուցե «Ելքի» հետ կարող են կոալիցիա կազմել, միգուցե Դաշնակցության, միգուցե «Ծառուկյան» դաշինքի, չգիտեմ»:

Հիշեցնենք, որ «Ծառուկյան» դաշինքն առաջարկում է Դաշնակցությանը համատեղ նախագծով հանդես գալ՝ ռեյտինգային ներկա համակարգը փոխելու համար, քանի որ Դաշնակցությունը ևս կողմ է դրան:

Ուշագրավն այն է, որ «Ծառուկյան» դաշինքը նման անհրաժեշտություն տեսնում է խորհրդարանի ընտրությունից համարյա մեկ տարի անց: «Այս ընտրական համակարգը բերում է նրան, որ Հայաստանում մշտապես մի քաղաքական ուժ մնա իշխանության, որովհետև էս դեպքում իշխանության փոփոխություն գրեթե անհնար է»,- նշում է Զուրաբյանը:

Նա գտնում է, որ ռեյտինգային ընտրակարգը բավական լուրջ հարված է հասցնում թափանցիկությանը և ընտրական կոռուպցիան մեծացնում է: «Իշխանությունն իր վերարտադրության համար ադմինիստրատիվ և բոլոր ռեսուրսներով կարողանում է ստանալ բացարձակ մեծամասնություն: Եվ իշխող քաղաքական ուժը պառլամենտում հաշվի չի նստում այլ ուժերի հետ ու ուժի զոռով անցկացնում է իր ուզած օրինագծերը»,- շեշտեց Արարատ Զուրաբյանը:

Ինչ վերաբերում է նախագահի ՀՀԿ-ի թեկնածու Արմեն Սարգսյանին սատարել-չսատարելուն, Զուրաբյանն ասաց, թե նոր Սահմանադրությամբ նախագահի պաշտոնը ավելի ներկայացուցչական պաշտոն է, իսկ Արմեն Սարգսյանի թեկնածությունը ամենավատը չէ. «Կարծում եմ, որ պետք է քննարկենք, նոր որոշենք»:

Մանրամասները դիտեք Արարատ Զուրաբյանի հետ Factor.am-ի հարցազրույցում:

Մարինե Խառատյան