Որևէ մեկը ձեզ իրավունք չի վերապահել կասկածի տակ դնելու իմ խոսքերը. Արփինե Հովհաննիսյանը՝ Սերգեյ Բագրատյանին

Ազգային ժողովում քննարկվում է ԱԺ փոխնախագահ Արփինե Հովհաննիսյանի ներկայացրած «Վարչական դատավարության օրենսգրքում փոփոխություն և լրացում կատարելու մասին» ՀՀ օրենքի նախագիծը, որով առաջարկվում է դատական նիստի լուսանկարահանումը, տեսաձայնագրումը, ինչպես նաև հեռարձակումը ռադիոյով, հեռուստատեսությամբ կամ համացանցով կատարել դատավարության մասնակից կողմերի համաձայնությամբ և դատարանի թույլտվությամբ:

«Վարչական դատավարության օրենսգրքի» 100-րդ հոդվածի համաձայն՝ այժմ դատական նիստի լուսանկարահանումը, տեսաձայնագրումը, ինչպես նաև հեռարձակումը ռադիոյով, հեռուստատեսությամբ կամ համացանցով կատարվում է դատավարության մասնակցի միջնորդությամբ՝ դատարանի թույլտվությամբ:

Հիմնական զեկուցող Արփինե Հովհաննիսյանը խոստովանեց, որ նախագծի ներկայացման ազդակները լրագրողական համայնքից են եկել:

«Ծառուկյան» խմբակցության պատգամավոր Սերգեյ Բագրատյանը փորձեց հակադարձել՝ նկատելով, որ չի կարծում, թե լրագրողներն այդ հարցով դիմել են Արփինե Հովհաննիսյանին: «Ինչպես կառավարության նիստերն եք որոշել փակել, այնպես էլ այս նիստերը»,- ասաց Բագրատյանը՝ պնդելով, թե գործող օրենքը «շատ ավելի լավն է»:

Նախագծի հեղինակ Արփինե Հովհաննիսյանն այս խոսքերից վրդովվեց. «Պարոն Բագրատյան, որևէ մեկը Ձեզ իրավունք չի վերապահել կասկածի տակ դնելու իմ խոսքերը և ասելու, որ ես չունեմ նման դիմում: Ինչ վերաբերում է կառավարության նիստերի դռնփակ լինելուն, ապա այդ հարցի առնչությամբ այս դահլիճում քննարկում կծավալվի, սակայն դա որևէ կերպ չի վերաբերում առաջարկվող կարգավորմանը»:

ԱԺ փոխնախագահը նաև նշեց՝ եթե գործող կարգավորումն ավելի լավն է, ապա կարող են դեմ քվեարկել նախագծին:

Մանրամասները՝ տեսանյութում:

Շողիկ Գալստյան