22.01.2026 | 23:29
ՀՀ տարածքում կան փակ ավտոճանապարհներ, Լարսը բաց է
Հայաստանում ամեն օր էլ ապրիլի 24 է. Պավել Մանուկյան
Հասարակություն
02.02.2018 | 13:39
Պավել Մանուկյանը շարունակում է պատասխանել իրեն ուղղված հարցերին: Ժիրայր Սեֆիլյանի գործով անցնող ամբաստանյալ Գևորգ Սաֆարյանը, որը ողջ դատավարության ընթացքում ոտքի չէր կանգնում, Պավել Մանուկյանին հարց հղելիս ոտքի կանգնեց՝ նշելով, որ դա անում է որպես հարգանքի նշան:
Գևորգ Սաֆարյանը Պավել Մանուկյանին խնդրեց պատմել Շուշիի բանտում գտնվելու օրերի մասին, ինչին ի պատասխան Մանուկյանը նշեց. «Չարչարում էին, մատներս էին կոտրում, եղունգներս քաշում, բայց դա անում էր թշնամին: Նրանցից սպասելիք չունեի: Հիմա էլ կրակել են ոտքերիս: Այս ոտքերն ինձ պետք չեն, ձեզ են պետք: Ես ողջ ընտանիքս եմ զոհասեղանին դրել, եթե կա մի բան որ չեմ դրել` ասեք»:
Նա նաև պատմեց իր և Սեֆիլյանի անցած մարտական ուղու մասին՝ նշելով, որ Սեֆիլյանը հերոս է, ում ամբաստանյալ կոչելու իրավունք որևէ մեկը չունի: Նա նկատեց, որ այսօր շատ «հերոսներ» շրջում են թիկնապահներով, մինչդեռ Ժիրայր Սեֆիլյանը միշտ քայլել է փողոցով միայնակ, առանց «պաշտպանների»:
Մանուկյանն ընդգծեց, որ զինված հեղաշրջման փորձի մասին խոսելն անհեթեթություն է. «Ասում են հեռուստաաշտարակ ենք ցանկացել գրավել, գրավենք՝ ի՞նչ անենք: Սաշիկը, Միշիկը գրավել են, հերիք ա»:
Մեղադրողները ևս հարցեր ուղղեցին Պավել Մանուկյանին, մասնավորապես՝ հետաքրքրվեցին, արդյոք ապրիլի 24-ին ցանկացել են փողոց դուրս գալ, որին ի պատասխան Պավել Մանուկյանն ասաց` ամեն օր էլ Հայաստանում ապրիլի 24 է. «Մենք որոշել էինք դուրս գալ ու ի նշան բողոքի մնալ փողոցում»:
Դատական նիստը շարունակվում է:
Լիլիթ Շաբոյան
